Nos legislacion ta garantisa e ehercicio liber di prensa na Aruba, pero tambe e proteccion di nos ciudadanonan pa e trabou responsabel cu prensa mester realisa den su tarea pa informa nos comunidad.
E dos aspectonan aki a keda refleha durante e lectura “Media, Etica y Derecho” duna pa rector di Universidad di Aruba, Glenn Thodé, organisa pa Elmar, en conexion cu Dia di Prensa.
Derechonan
Den su disertacion e academico a indica cu prensa ta un di e pilarnan di un pais democratico cu mester garantisa e ehercicio liber di e trabou di medio di comunicacion. Entre mas informacion transparente ta wordo divulga, e ta midi e nivel di democracia di un pais. Pero esun cu ta realisa e trabou di prensa mester tene cuenta cu Etica, ya cu etica ta un compas moral cu ta indica kico ta bon y kico no ta bon.
Sinembargo ora cu prensa ta realisa su trabou, esaki ta crea un relacion di derecho, derecho pa informa, pero derecho riba e persona of instancia cu ta wordo afecta cu cierto informacion caminda hues mester bin cu un decision of veredicto. sr. Thodé a bisa cu hues mester evalua bon su decision, ya cu e ta crea un precedente riba caso di e mesun categoria of similar cu tin di haber cu prensa.
Aunke na Aruba no ta existi un ley specifico di prensa, ta existi reglanan pa radio y television (medionan electronico), pero no pa prensa skirbi. Pero e leynan aki ta aplicabel pa tur media ora cu un incidente cu prensa mester wordo resolvi dilanti di mesa berde.
Principionan
Tambe ta existi tratado y convenio internacionalmente reconoci manera e declaracion di principionan di prensa di IFJ (International Federation of Journalists). Ta asina cu si hues no tin un ley specifico pa atende cu un caso, e por aplica tratadonan y convenio a base di analogia di casonan similar.
Nan ta nuebe principio cu sr. Thodé a referi na dje entre nan: Prensa mester informa e berdad. Prensa mester trece su informacion den un forma husto. Proteccion di e fuente periodistico. E punto aki a hala basta atencion y te hasta caso a wordo treci dilanti manera casonan di informacion cu algun hende ta drop den post box, sin cu e periodista sa for di ki fuente el a bini. sr. Thodé a laga sa cu den un caso asina “mester tin espacio pa verificacion”.
Un punto cu el a pone enfasis riba dje ta, cu e periodista ta gosa di e facultad di tin acceso na tur informacion, y esaki no por wordo nenga. Ya cu nan tin e derecho di realisa e trabou ey pa comunidad, basa riba berdad. Igualmente el a laga sa cu prensa ta protegi pa haci e trabou aki, ya cu e ta un principio.
Otro principio cu prensa mester tene cuenta cu ne, vooral actualmente cu tin hopi debate riba temanan di igualdad sexual y reconocimento di derecho entre pareha di e mesun sexo, ta cu prensa no mag di discrimina ya sea riba motibo politico, rasa, sexualidad, religion, etc…
Tambe prensa no mester comete plagio, ya cu ta existi proteccion pa no uza informacion di otro sin autorisacion. Tampoco prensa no mester cay den acto di corupcion.
Privacidad
Un punto cu a hala atencion special durante e lectura di Dr. Thodé na Alhambra Ballroom -cu a conta cu presencia di miembronan di prensa y di personal di staf di Elmar- tin di haber cu proteccion di privacidad. Tambe privacidad ta parti di un principio cu prensa mester tene cuenta cu ne, specialmente awendia cu e medionan digital manera website y plataforma digital manera Facebook tin su impacto. Esaki a facilita cu tur hende tin acceso no solamente pa haya informacion inmediato sino tambe di divulga informacion asumiendo e rol di prensa.
E ta un punto delicado, ya cu no tur hende tin e formacion etico y periodistico pa divulga informacion, segun sr. Thodé. P’esey el a haci referencia cu awor e polisanan di privacidad a wordo fortalece pa evita cu e ciudadano su derecho di privacidad no ta wordo viola. E tipo di polisa aki no tabata existi 20 aña pasa, pero e desaroyo nobo den mundo digital, unda tin no solamente divulgacion masivo di potret, sino tambe manipulacion di potretnan, a haci cu e tipo di polisa riba privacidad a wordo reforsa.
El a laga sa cu tin ley di proteccion di uzo di potret sin permiso. A pesar cu prensa tin derecho pa divulga informacion, di otro banda cada ciudadano tin derecho pa nan bida personal y priva ta wordo respeta.
Practicamente ta existi un linea fini entre kico ta wordo considera como bida priva y bida publico, specialmente ora cu ta trata di un persona of funcionario publico. El a bisa cu den e caso aki, hues ta esun cu mester midi e dos interesnan aki.
Gradicimento
E lectura aki a resulta uno hopi interesante pa e publico presente, caminda sr. Thodé y sra. Wanda Broeksema, PR di Elmar a gradici e presencia y participacion di cada un di nan.
Igualmente sra. Broeksema a presenta un historia breve di evolucion di prensa na Aruba, unda el a destaca cu Bon Dia Aruba a bira e prome corant na color imprimi na Aruba. Tambe cu Aruba ta den e top 10 di e paisnan cu tin mas media per capita den henter mundo
