Cambio di ministro y parlamentario… No cambio den desafio…

E siman aki nos ta testigo di cambio di tanto mandatario como parlamentario. Un ministro nobo pa Desaroyo Teritorial, Infrastructura y Medio Ambiente, y dos parlamentario nobo na banda di e coalicion gubernamental. Den e caso di e mandatario por bisa cu e no ta nobo tampoco, el a maneha e cartera aki un biaha caba, asina ta cu e ta na altura di kico ta e desafionan cu e ta haya na su yegada. Pa e parlamentarionan si ta conta cu ta trata di nan prome aparicion den e ambito aki. Di nan tambe ta spera un contribucion den tempo dificil, pa e varios asuntonan cu parlamento ta haya pa maneha proximamente. Un resumen di e posible desafionan.

Pa e ministro ta importante maneha e asuntonan cu a keda riba mesa, despues cu su colega y lider di partido a dicidi di renuncia y cuminsa otro fase di su bida. Entre esakinan ta resalta por ehemplo e caso di Serlimar, cu no a keda resolvi y cu ta urgente, pa varios motibo. Uno ta cu no por laga tanto tempo pasa sin un cambio di ley, pa duna guia den e asunto importante y controversial aki, pasobra di esey lo depende con e tema general di procesamento di desperdicio ta bay haya perspectiva, ohala positivo, den e proximo añanan. Esey no lo ta facil, pasobra basicamente nada no a cambia, y si algo a cambia, ta pa pio. Na e momento aki ta tumando lugar e accion di firma di e activistanan di Parkietenbos pa haya apoyo pa nan punto di vista. Pero mester tuma na cuenta tambe cu tin protesta contra funcionamento di e landfill na Sero Teishi, cu tambe ta percura pa molester di holor malo y contaminacion di medio ambiente. E caso aki ta mustra nos tur bon cla con dificil e ta pa maneha desperdicio riba un teritorio asina chikito; literalmente no tin caminda di sconde cu e cosnan aki, esey sigur riba un isla unda a tuma lugar urbanisacion descontrola riba gran parti di nos teritorio, cu ta haci cu tur caminda tin hende ta biba, y anto ta tur caminda mester tene cuenta cu e hendenan ey. Esey ta conta en general pa tur actividad tambe, di industria o otro actividad economico. Tambe mester tene cuenta cu mas tarda, mas placa gobierno mester hinca den Serlimar pa nan por opera, pasobra e compania no ta logra, cu e medionan disponible awor, pa recauda suficiente recurso pa opera riba su mes. Esaki sin bay den detaye di posible mal maneho, loke ta critica cu a tende; simplemente por constata cu gran parti di e poblacion no ta contribui ainda y gobierno mester para pa e consecuencianan. E problema ta cu no por sin mas trece e proyecto di ley cu no por a haya un mayoria den votacion atrobe. Algo diferente lo mester sucede cu ta trece atrobe e pregunta grandi dilanti: Aruba mester di un incinerator? Nos no por keda cay den repiticion cu e asunto aki. Tarea importante anto pa e ministro nobo.

Di otro banda, nos no ta mira tanto cambio den parlamento, unda entrada di miembro nobo no ta trece cambio den e corelacion di forsa den e organo legislativo. Gobierno di coalicion a keda depende di un mayoria minimo, cu ta rekeri cautela pa maneha. Sin embargo, nos ta mira tambe cu e coalicion ta atendiendo e presion cu tabata existi pa tuma paso pa loke ta e tema di cannabis (medicinal), no solamente den sentido di importacion regula di cannabis medicinal, sino tambe facilitando produccion di cannabis medicinal na escala relativamente grandi pa exportacion. Nos no ta convenci ainda di e viabilidad di e proyecto aki, mirando e competencia fuerte cu por spera di otro paisnan den nos region, cu tambe a cuminsa caba cu e tipo di proyecto aki, y den condicionnan hopi mas faborable di clima, di nivel di salario, pa menciona algun. Produccion agricola, o di horticultura den e caso aki, no ta barata bao di e condicionnan cu nos isla ta brinda. Pero tin algo mas cu a capta nos atencion. Nos ta tende di diferente banda cu ya tin sigur cuatro candidato wardando pa cuminsa, riba e tereno di loke awor ainda ta e refineria. Nos ta dispone hasta di presentacion di un di nan. Nos pregunta ta: pakico no tin un proceso di destaho publico pa emiti e parcelanan cu ta disponible? Con por ta cu ta pone suma den presupuesto pa e aña aki, y oficialmente no tin un plan conoci, no tin ley adapta ainda, no tin organo supervisor, etc. Pero nos mester kere anto cu tras di cortina ya tin suma menciona pa licencia cu ta bay emiti, ken ta haya nan, etc.? Nos ta keda papia di transparencia y integridad, mientras den practica ta ‘business as usual’?

Pero prome cu e temanan aki drenta parlamento, nos lo tin un presupuesto 2020 cu su interogante y desafionan, cu ademas no a yega parlamento ainda tampoco. E problema no ta pa pasa esaki den parlamento na Aruba, pero kico ta haci cu eventual critica di CAft si resulta cu nan ta haya cu tin punto menos realistico den e presupuesto? E problemanan eynan no a termina ainda.