Parlamentario di oposicion, Mervin Wyatt-Ras a bin cu critica fuerte riba e resultado di e Crisis Plan Social cu e gobierno actual a introduci pa atende cu e problematica social cu ta afecta nos comunidad.
Wyatt-Ras a bisa cu e crisis plan social ‘no ta dunando e resultadonan spera.’ Pasobra e tin conocemento di personanan cu a bay cerca nan pa yudansa. E ta kere cu eynan ta e ‘bottleneck’, caminda e ta haya cu e minister en cuestion tin diferente relacionista publico (PR) cu el a nombra pa haci promocion, prome cu a bay atende cu e problema aki.
Segun Wyatt-Ras, ora cu bo ta papia cu clientenan cu tin un problema y cu mester haya e yudansa, e situacion ta mesun cos cu locual e mandatario di Asunto Social a yega di critica. Un di e criticanan tin di haci cu e cliente mester warda largo y no tin cooperacion entre instancianan. “Eynan mi ta kere cu tin e bottleneck cu tabatin antes tambe,” el a bisa.
E ta haya cu bo por hinca hopi placa aden di e sector social y den cualkier otro sector, pero si e diferente actornan no ta traha hunto, dificilmente nan por logra. “Den caso di abuso di mucha, bo mester traha hunto, sino e no tin su resultado cu e efecto desea,” el a bisa. E parlamentario a agrega cu no solamente na Aruba a wordo constata esey, pero tambe internacionalmente profesional ta constata esey.
Pero no solamente e parti di cooperacion no a wordo ehecuta debidamente, sino e registracion, ya cu ta importante pa compila dato pa asina atende cada caso. Solamente asina bo por monitor e desaroyo di e victima, si e ta ainda den un situacion di abuso. Esaki tambe ta un forma pa preveni tambe cu mañan e victima mes lo por bira un abusado. Pero nada di esaki ainda no a wordo ehecuta, segun e parlamentario di oposicion.
