Na april proyecto di Gateway 2030 ta inicia: Comision di departamento di gobierno lo selecciona desaroyado di Port City

Minister di Turismo, Dangui Oduber a informa cu ya caba nan a cuminsa cu e fase di sondea kende ta interesa pa desaroya e mega proyecto di Port City. E ta un proyecto cu ta wordo desaroya cu inversion di sector priva, caminda gobierno ta considera cu e ta un proyecto cu lo bay genera empleo, stimula economia, y genera entrada pa gobierno.

Otro proyecto ta esun di Gateway 2030 cu ya caba su proceso di destaho publico a culmina. E proyecto a wordo asigna na un contratista, y e ta bay cuminsa oficialmente den luna di april.

Port City.
El a agrega cu lo tin un comision di gobierno cu lo evalua tur e peticionnan cu ta drenta. Contestando pregunta di Bon Dia Aruba, e hoben minister a indica cu un comision lo ta esun responsabel pa determina kendenan ta esnan na finalmente lo bay haya opcion pa bin cu un sorto di desaroyo den Port City.

E comision ta instala caba y e ta wordo integra pa medio di departamentonan di gobierno, entre nan DOW y APA tambe. E mandatario a sigura cu e proyecto aki lo wordo desaroya di un manera responsabel y den fase.

Segun minister Dangui Oduber, nan kier pa e proyecto di Port City bira un proyecto di calidad sumamente halto. Algo innovador of nobo cu Aruba no tin na e momento aki. E plan cu nan tin ta uno sumamente ambicioso, y e ta bay den fase pa e proximo 15 pa 20 aña.

‘Marktverkenning’
E mandatario a bisa cu den tur medio di comunicacion a wordo publica un ‘marktverkenning.’ Aunke como gobierno nan sa kico nan kier mira como desaroyo den e area aki. Pero tambe nan ta considera importante pa por scucha kico ta e interes di parti di inversionistanan, ya cu e proyecto aki lo wordo desaroya cu inversion priva.

APA mes ta bay inverti den e parti di infrastructura y tur loke ta bin ariba lo wordo realisa pa medio di inversionistanan priva. E mandatario a reitera cu nan preferencia ta pa inversionista local haci’e, ya cu intencion ta pa bin cu boutique hotel. E ta kere cu e tipo di proyecto aki lo por wordo financia pa medio di banconan local.

Aworaki den e fase di ‘marktverkenning’ tur inversionista lo bay expresa nan interes y pensamento kico nan kier mira como desaroyo. Despues e siguiente fase lo ta pa nan presenta oficialmente e proyecto kico nan kier bin cune. Pero tambe cuanto e inversion lo ta y ki sorto di proyecto esaki lo ta. Igualmente con e proyecto lo beneficia economia di Aruba, cantidad y tipo di empleo cu lo bay crea. “Nos kier haci un diferencia riba Port City,” el a bisa.

El a bisa cu e proyecto aki lo wordo desaroya den e area di 20 hectarnan cu antes tabata destina pa e waf di container y ex Free Zone. Sinembargo apenas 8 di e 20 hectarnan di e area aki lo wordo destina pa un desaroyo boutique hotel y actividad comercial.

Segun nan vision, nan lo ta hotelnan hopi chikito di calidad halto hunto cu un conference center. “Mas di e mita di e tereno ta bay pa pueblo y uzo pa pueblo,” el a bisa. E mandatario kiermen cu e otro area di 12 hectar lo ta destina pa recreacion y espacio publico pa comunidad.