Parlamentario Setty Christiaan-Yarzagaray: Aruba ta den faceta con bo ta haci midimento di SDGnan

Proximo reunion interparlamentario di Reino, miho conoci como IPKO, lo trata den su agenda entre otro riba desaroyo y implementacion di e metanan global di sostenibilidad of SDG (Sustainable Development Goals) den e diferente partner den Reino.

Parlamentario Setty Christiaan-Yarzagaray a forma parti di e comision cu a delibera riba e topico aki den e reunion cu nan a sostene na Corsou recientemente den cuadro di e preparacion di IPKO.

Contestando pregunta di Bon Dia Aruba, e parlamentario menciona a bisa cu den e comision aki a sali dilanti cu e punto mas importante ta esun con nan ta midi e logronan di e 17 metanan pa 2030. “Aworaki Aruba mes ta den e faceta con bo ta haci e midimento, y con miho pa haci esaki,” el a bisa. Pero si el a sigura cu Aruba ta bayendo bon.

Fondo y midimento.
Un reto tin di haci cu e parti di disponibilidad di fondo financiero pa asina e comision na Aruba encarga cu e SDGnan por realisa su trabou. Ya cu e tin un parti di conscientisacion den dje, caminda comunidad mester wordo conscientisa kico ta e metanan di desaroyo sostenibel, ya cu niun hende mester wordo laga atras. Si por ehempel nos kier eradica pobresa, cu ta e meta number uno di e SDGnan, mester envolvi henter pueblo.

Ora cu Nacionnan Uni a bin cu e SDGnan, tambe nan a bin cu un lista di indicadornan cu nan kier pa Aruba y cualkier pais por logra cierto metanan. Nan ta 17 meta, pero tin alrededor di 169 diferente meta, y cada un di nan tin indicadornan pa midi si nan a yega si of no. Den e caso aki, Caribe tin un formato un tiki diferente compara cu paisnan grandi. E no tarea facil ya cu e ta un lista basta largo di metanan, segun e parlamentario.

“Pero e mas importante ta cu e indicador mester wordo midi den e mesun formato,” el a bisa. Kiermen nan mester wordo midi di e mesun forma pa bo por compara nan. P’esey e ta haya -a base di su experiencia y profesionalismo den Oficina Central di Estadistica (CBS)- cu e indicador ta wordo uza practicamente den e mesun formato. Esaki mester wordo haci den colaboracion cu otro partnernan y grupo amplio pa logra un siguridad den e proceso aki.

Aruba.
Pa loke ta Aruba, parlamentario Christiaan-Yarzagaray a laga sa cu nos pais ta na nivel cu tin hopi departamento envolvi, ya cu e metanan ta hopi amplio, entre nan esun mas importante manera departamento di Asunto Economico. E comision na Aruba ta resorta grandemente bou e departamento aki conhuntamente cu CBS cu a yega di atende conferencia y cursonan na nivel di Caribe entre nan cu CARICOM.

Pero tin mas departamento y instancia envolvi cu tin un rol hopi activo, y nan tin nan propio hende asigna pa atende cu e SDGnan. E nivel aki cu no ta uno facil a wordo logra na Aruba caba. Te hasta nan a yega di tene contacto y reunion cu representantenan di e seccion di desaroyo di programa di Nacionnan Uni. Pues practicamente nan ta trahando aworaki basta ariba riba data na Aruba.