Simar a tene un conferencia di prensa pa anuncia cu Unit managers di EPI y minister a yega na otro y a firma e acuerdo. Den esaki tin e puntonan cu ora e managers a sinta cu minister na mesa a dun’e e condicionnan cu e managers lo bay di acuerdo cu ne pa e managers por regresa nan trabou, cual minister a acepta y nan a firma. Dialuna managernan ta bek na trabou y tin diferente prioridad pa atene cu ne.
“Tabatin hopi impasse entre Simar, managernan y gobierno anto a haci cu diabierna a invita minister pa un ultimo reunion pa nos presente kico nos kier pasobra den principio minister a duna algun ora, pa docentenan por vang op e trabou di un tercer manager. Anto e ora eynan nos a bis’e cu nos kier pa e managernan tin e mesun derecho di tuma decision y carga e responsabilidad di manager normal. Eynan minister no tabata bay di acuerdo cu esey y Simar a bis’e cu e mester ta den man di e managernan pa nan por scoge cua ta e docentenan cu nan ta haya cu ta califica pa cumpli cu e funcion y despues di esey minister no a responde mas. Pero a responde cu un corte sumario unda e kier a obliga e managernan bay traha mirando e situacion cu a surgi na EPI door di a start e scol cu e rooster di aña pasa entre otro mas cos cu a bay robes.”
Segun Sra. Lazo – Tromp, durante di e caso, e abogado di gobierno a acepta e condicionnan cu Simar a pone, pero cual cu Minister no a responde. Eynan hues a busca cu e no ta wak e pakico ta dilanti dje mes, si ya minister a bay di acuerdo. Pues despues di esaki hues a manda ambos partido pa sinta na mesa pa yega na un acuerdo cu otro. Esey a keda ta delibera pa algun dia, unda cu awo segun e presidente di Simar, porfin por bisa cu nan a acepta full e puntonan cu nan a pone, nan a manda e acuerdo y Simar a firma esaki. Hues no a obliga Gobierno pa acepta e condicionnan cu e Unit Managers di EPI a stipula.
Dialuna e managernan ta reanuda trabou dialuna 100% pero nan tin nan prioridadnan cu nan lo traha riba dje, cual minister tambe ta di acuerdo cu ne.
Tin desacuerdonan pendiente
Bon Dia Aruba a puntra Sra. Lazo – Tromp si esaki kiermen cu a resolve tur e desacuerdonan aworaki. El a bisa cu ainda tin algun desacuerdo pendiente pero locual ta trata e motibo cu a welga a wordo resolvi. Minister a bisa tambe cu e lo bay haci investigacion cu lo mester culmina den 4 luna. Simar a bay di acuerdo pa duna e espacio ey y mientrastanto ta soluciona e problemanan di tal forma cu nan por funciona. Pues ta warda e investigacion e ora ey pa wak con ta sigui verder, el a termina bisando
