Prome minister Shinzo Abe a bisa ayera cu Hapon lo forma un unidad di defensa espacial pa protege su mes di menasa potencial mientras su rivalnan ta desaroya misil y otro tecnologia, y e unidad nobo lo traha cerca cu su contraparte Mericano recientemente lansa pa presidente Donald Trump.
Unidad di Mision di Dominio Espacial lo cuminsa na april como parti di Forsa Aereo di Defensa Propio di Hapon, Abe a bisa den un discurso di politica marcando cuminsamento di sesion di aña parlamentario.
El a bisa cu Hapon tambe mester defende su mes di menasa den espacio cibernetico y di interferencia electromagnetico contra satelite Hapones. Preocupacion ta aumentando cu China y Rusia ta buscando manera pa interferi, desactiva of destrui satelite.
E unidad espacial lo uni na un base aereo existente na Fuchu den suburbio occidental di Tokyo, unda alrededor di 20 persona lo ta emplea prome cu un lansamento completo na 2022. E rol di e unidad espacial ta pa conduci nabegacion y comunicacion basa riba satelite pa otro tropanan riba e campo, na luga di ta riba suelo.
Gabinete di Abe na december a aproba un presupuesto di $460 miyon pa proyectonan relaciona cu espacio, pendiente di aprobacion di parlamento. E unidad lo coopera cu US Space Command, cual Trump a establece na augustus, como tambe e agencia di exploracion espacial di Hapon.
Subrayando e necesidad di reforsa seguridad cibernetico, Mitsubishi Electric Corp. a revela dialuna cu a sufri un atake cibernetico juni ultimo, cu por a compromete data personal y corporativo involucrando miles di su aplicantenan di trabou, empleadonan y pensionadonan. Mitsubishi a bisa cu no tabatin violacion di data sensitivo den e operacionnan di e compania involucrando defensa, espacio, transporte, energia electrico y otro sector comercial. A priminti di reforsa medidanan di seguridad y monitor.
Abe a pusha pa e Forsa di Defensa Propio di Hapon expande su rol y capacidad internacional door di reforsa cooperacion y compatibilidad di arma cu Merca, mientras cada bes mas ta traha hunto cu tropanan Mericano y mientras ta bira mas preocupa pa e capabilidadnan aumenta di China y Nort Korea.
Abe, marcando e 60 aniversario di e firma di e tratado di seguridad Hapon-Merca diadomingo, a priminti di reforsa capabilidad y cooperacion di Hapon cu Merca, incluyendo den area di espacio y seguridad cibernetico.
El a bisa cu e ta determina pa resolve e ‘pasado desafortuna’ di Hapon cu Nort Korea, mientras ta spera di ‘resumi’ e legado post-guera di su pais prome cu su termino caba otro aña.
El a reitera su intencion di tene negociacion cu lider Nort Koreano, Kim Jong Un, sin e condicionnan cu el a exigi den pasado – desnuclearisacion di Peninsula Koreano y resolucion di e problema decadanan bieu di secuestro di ciudadanonan Hapones pa Nort Korea.
Parti di e plan di Abe mientras e tin su cargo ta pa logra su meta di revisa e constitucion Hapones, skirbi pa Merca, cu ta prohibi uzo di forsa pa resolve disputa internacional. A pesar di impulso di Abe, chens ta cabando pa e revision, pa motibo di falta di interes publico y enfoke di oposicion riba otro asunto, manera e lansamento reciente di tropanan naval Hapones na Medio Oriente.
Den un señal cu relacion tenso recien entre Hapon cu Sur Korea ta mehorando, Abe a bisa cu e tin plan di coopera cercanamente cu Sur Korea den maneha un ambiente dificil pa seguridad den Asia nort oriental.
Sinembargo, Abe a ripiti su demanda pa Sur Korea resolve e asunto di compensacion pa e ex- trahadonan Koreano durante e gobierno colonial Hapones di 1910-1945.
