Minister di Cultura, Xiomara Maduro a anuncia cu Comision di Celebracion di Dianan Nacional a traha un programa pa celebra Dia di Betico. E ta un siman di celebracion en conexion cu Betico Croes su natalicio.
Tambe el a pidi henter nos comunidad pa den cuadro di e dia nacional aki, hisa nos bandera di Aruba, y mustra nos amor patrio. “Danki na Betico nos tin e bandera y nos tin tambe nos himno,” el a bisa.
E mandatario a declara cu Betico tabata ‘prome cu tur cos, un ciudadano di pais Aruba, un maestro. Pero tambe banda di dje un politico, un estadista. Un hende cu a sa di laga un legado grandi. Un libertador pa nos pais…’
Pa duna contenido na celebracion di Dia di Betico, diabierna awor dia 24 di januari lo tin un manifestacion cultural for di 7pm pa 10:30pm na Plaza Betico Croes. E anochi ey, Grupo di Betico cu ta celebrando su 50 aniversario di existencia, lo ta deleitando publico presente cu un bon concierto. E ta un bon ocasion pa nos tur bini hunto y celebra. Pero tambe e ta un oportunidad pa expresa nos gratitud na e feliz memoria di Betico, ya cu ‘nos tin hopi pa gradici na e estadista Betico Croes,’ e mandatario a bisa.
Tambe durante siman lo distribui un buki na tur scol basico tocante Betico su bida y logronan. Maduro a laga sa cu ta importante pa nos hobennan por haya e informacion aki, pa nan haya sa kende ta Betico. El a gradici e comision cu a percura cu e aña aki por tin un buki dedica na Betico. Un ehemplar di e buki aki a wordo obsekia na e representantenan di prensa local presente den e conferencia ayera mainta.
Tambe lo tin un acto protocolario diasabra awor, dia 25 di januari pa 9or di mainta na Plaza Betico. Tambe lo tin un competencia di pintura na nivel di scol basico den cuadro di e celebracion nacional aki.
