Algun dia atras, Colegio Arubano a haya un alerta pa un ‘School Shooting’ na unda siguridad di scol y alumnonan a haya un menasa serio, cu a pone cu a tuma tur medida di precaucion.
Anuesca Baly, director di Skoa, a splica cu tur scol desde aña pasa a cuminsa haya charla, tanto individualmente como scol y conhuntamente como ekipo, di Cuerpo di Polis caminda nan a toca e tema di school shooting y ki por haci den un situacion asina.
Baly a comenta cu den un tayer nan a haya tur informacion pa prepara e docentenan y cabesantenan. Asina mes, el a bisa cu tambe nan a acerca Bureau Rampenbestrijding Aruba y di nan tambe a haya un tayer. Tocante esaki el a laga sa cu cada scol di bario ta trahando nan ekipo den caso cu tin un problema, tur hende sa kico pa haci.
“E ta nos tarea, no solamente pa duna informacion pa mayor, pero trece siguridad bek den nos scolnan riba tur nivel”, Baly a sigura.
El a declara cu tambe nan a traha den un ekipo pa un protocol firma un par di aña atras, unda cu e protocol ta bay revisa pa wak con cada scol ta bay traha cune y con por maneha cierto incidentenan cu scol por haya.
Awendia, mundo ta moderno y e muchanan ta otro, p’esey ta hopi importante pa por educa e mayornan pa asina tin e triangulo completo: cas, scol y parokia.
Di mesun manera, a comenta cu e aña aki nan lo cuminsa cu entrenamento mas specifico, por ehempel un ekipo di crisis lo tin su funcion y su rolnan, pa e rolnan aki mester haya cierto entrenamento.
Esaki ta nifica un gasto extra den presupuesto, manera e mes a expresa, pero Bureau Rampenbestrijding Aruba a haci e peticion pa prome minister y asina por haya e fondonan necesario pa e tayernan aki por tuma luga. Tin scolnan cu a cuminsa caba, pero esaki ta bay den fase, pa motibo cu Skoa tin 46 scol.
“E deseo di Skoa ta pa tur nos scol ta ekipa y acapara cu tur informacion cu nan mester, pa nos ta bon ekipa”, Baly a afirma.
Di otro banda, el a duna di conoce cu na e momentonan aki, tin dos scol cu ta forma parti como proyecto piloto di loke ta trata ‘hekwerk’ na unda no cualkier persona por drenta den scol. Asina tambe a coloca camaranan di siguridad, tur esaki ta esfuerso cu scol mes a haci riba su mesun fondonan.
