Ayera fundacion Rancho a inauguracion E Hanchi di Calki. E ta un di e cuater hanchi cu e fundacion aki ta bin trahado: Calki, Awa, Piscado y Construccion. Presidente di fundacion Rancho, sr. Clifford Rosa a bisa cu e hanchinan aki ta hayando basta atencion danki na e Feria Social di CEDE Aruba caminda nan ta haya un suma pa nan por traha pa realisa e proyecto aki.
Diferente expresion di arte y limpiesa a wordo haci pa rescata e hanchi aki caminda e prome borchi a keda inaugura. El a bisa cu e problema di sushi ta algo cu ta keda mira como un problema den Oranjestad y sigur den Rancho, y muy particularmente den e hanchinan.
Cambio den Rancho
Sr. Rosa kier resalta cu e proyecto aki di e hanchinan den Rancho ta bay trece un cambio riba e tereno aki. Y esaki a keda resalta den e inauguracion di e Hanchi di Calki cu a tuma luga ayera tardi. E limpiesa aki tin un balor agrega –segun presidente di fundacion Rancho- ya cu ta resalta e calichi nan cu tin eynan. Pero tambe nan ta expresa un idea con pa transforma e area aki y dor di e proyecto “Adopta un Hanchi”, nan por sigui elabora riba e hanchinan y trece un transformacion completo pa Rancho.
Nan ta pidi e comunidad y e bisiñanan di Rancho pa brinda nan colaboracion pa mantene e bario aki limpi. Sinembargo e adictonan ambulante ta treciendo e sushedad cu nan ta hayando di e sector comercial di e area aki.
“Bo ta mira cu no ta un sushi normal sino cu ta un poco di sushi cu tin biaha comerciantenan cu ta trece e sushi tambe”, el a declara. E ta pidi pa e comerciantenan di e sector aki pone mas atencion pa cu e limpiesa, y pa cera cabes pa mantene e bario limpi “mirando cu nos tin un futuro briyante pa cu e bario di Rancho den diferente aspecto”, el a bisa.
Nan ta observa un cambio, ya cu nos hendenan local mes ta bishitando mas e area y nan ta desea di por mira den futuro turistanan cu ta bishita e bario historico di Rancho.
Hunto cu fundacion BASHA caminda un grupo di artistanan a trece nan poemanan y declama nan lo trece un ambiente otro. El a gradici e artista Mo Mohammed kende a lanta den Rancho y cu semper ta aporta na su desaroyo positivo.
