For di 1 januari a haci anuncio cu Elmar lo bay tin reduccion den tarifa di coriente. Tur cliente di prepago lo por ripara ora cu e tarifa baha, pero esunnan cu tin postpago lo haya recibo di januari te na februari, ora nan lo wak e rebaho di e tarifa.
Albertico Koolman, director suplente di Elmar a splica cu e rebaho no lo ta den e recibo di awo januari 2020, pasobra tin e confusion di cobransa di december 2019. A saca e recibo y a calcula e tarifa bieu cu lo coregi y nan lo hinca tarifa nobo den dje. E recibo di januari lo sali den conexion di esun di februari.
Koolman a duna un splicacion di e diferencia cu hende lo por mira den nan rebaho. Un persona cu ta paga un averahe di 280 pa 300 lo baha pa 10%, si e persona ta paga 280 florin e ta baha cu 28 florin, ta depende con ta uza e coriente pa e yega na 10%.
Manera e ta splica cu a base di cuanto ta paga pa luna ta depende si ta negoshi of cas. Depende e comerciante lo sinti un rebaha di 8% y un residencial 10%, pero nan lo wak e baha di antes pa actualidad.
Nan lo por ripara den e recibo e prijs di kilowatt pa ora, esey nan lo wak y lo baha automaticamente. Sinembargo ora hende ripara e rebaho, nan lo kier gasta mas coriente of lo kier consumi mas, pero si haci esey, e no lo ripara e cambio di prijs.
Koolman ta recomenda pa hende cambia nan habito den uzo di coriente. Sea si nan ta pensa cu ta barata awo lo laga e airco cendi, pero asina no lo ripara un rebaho. E ta bisa cu mester keda conscientisa comunidad pa e desaroyo y reto pa cambio cu tin tur dia, ‘no ta facil pa evalua e situacion, aki ta ripara cu toch tin cu no ta consciente’, y Elmar lo sigui purba di yuda nan.
Nan ta biniendo cu proyecto cu lo cuminsa aki par di luna pa cu e spaar meternan lo cambia pa smart meters. Cu e cambio lo por haya e consumo di cliente cada 15 minuut pa dia y pa siman, anto e ora por yuda e cliente pa wak ki dia e consumo ta halto y por yuda nan baha esey y ta mas consciente.
