Ayera mainta e oficina nobo di Departamento di Progreso Laboral (DPL) ubica na caya Engelandstraat, a cera su porta pa motibo cu e luga ta contamina cu beskem loke ta ocasiona hopi daño pa e salud di e trahadonan.
Bon Dia Aruba a tuma contacto director di oficina Ronny Irausquin y el a informa cu Gerencia di DPL conhuntamente cu Minister di Labor Glenbert Croes, a dicidi di cera DPL pa asina duna espacio na e Inspector di ARBO pa haci un investigacion profundo riba e problematica di beskem cu a surgi.
Tambe, Bon Dia Aruba a tuma contacto cu Magaly Brito di Sindicato SEPPA y el a aclaria cu e problema aki a surgi varios dia pasa y cu si e trahadonan a pone nan trabou abou e no tabata na haltura di dje, locual el a splica ta cu e tabatin contacto den dianan aki cu bureau di minister di Labor y su expertonan riba e problematica aki cu e trahadonan a indica cu e luga tin beskem y e luga no ta esun mas adecua pa traha.
Basa riba esey, Brito a señala cu for di diamars den oranan di anochi e director di DPL a comunica p’e cu nan a dicidi pa cera e luga diaranson y asina haci un analisis di kico ta pasando y despues di e resultado di ayera nan a dicidi di cera e dianan di awe diahuebs y mañan diabierna pa nan por haci limpi y prepara e luga manera mester ta.
“Mi no sa di na unda e informacion cu trahadonan a pone nan trabou abou a sali” Brito a bisa pa motibo cu desde diamars anochi el a haya informacion cu lo mester cera e luga pa wak kico ta e problema realmente y no tabatin necesidad pa trahadonan pone nan trabou abou, Brito a sigura.
