Alcalde di Bogota, Claudia Lopez, siman pasa a indica cu ‘no lo por prohibi corrida di toro’ pa motibo cu ‘desafortunadamente’ ta existi un sentencia di Tribunal Constitucional cu ta apoya esey, pero a splica cu Alcaldia ‘“no lo duna recursonan publico pa esaki’.
E alcalde nobo di e capital Colombiano a detaya con durante su mandato ‘lo bay haci pedagogia contra e practica cruel pa bestianan’.
“Ta un barbaridad cu nos por disfruta di haci daño pa un ser bibo y nos ta yama esey cultura. P’esey den mi Gobierno no lo haya ni un solo peso di placa publico pa e tipo di espectaculo aki”, Lopez a sigura.
E decision di Lopez ta uni pa e proyecto di ley cu e animalistanan, un di e sectornan cu a apoya Lopez, a presenta pa purba di elimina interes riba e tipo di espectaculo aki.
Algun di e medidanan ta consisti di obliga e organisado pa financia e tipo di actividad aki sin conta cu apoyo di administracion publico, asina como aumento di 20% di e cifra pa realisa corrida di toro.
Prohibi e benta di alcohol den e luganan, asina como e uzo di instrumento cu ta provoca daño pa bestianan, como pico, bandera y tur sorto di material asina, ta otro di e medidanan contempla den e proyecto di legislacion.
Claudia Lopez a asumi como prome alcalde femenino di Bogota dia 1 di januari pasa. Durante su discurso a priminti un gestion enfoca riba e lucha contra ‘racismo, clasismo, machismo y xenofobia’.
