Ayera mainta, minister di Husticia Andin Bikker a duna su prome conferencia di prensa pa e aña y a splica e situacion di atraco cu a tuma luga diasabra ultimo den area hotelero y tambe a trece dilanti un decreto pa loke ta e rijbewijs digital y su cambio di diseño.
Di loke ta trata e caso di atraco specificamente na Hotel Ritz Carlton, minister Bikker a bisa cu un joyeria tabata e victima y a duna di conoce cu den un par di minuut Cuerpo Policial tabata den e luga y nan a logra detene un persona cu status ilegal di nacionalidad Venezolano cu ta e sospechoso den e caso aki.
Den cuadro di esaki, minister Bikker a informa cu ayera mainta tabatin un reunion cu Ministerio Publico, Halto Comisario di Polis, Siguridad Nacional y SDBI, den esaki nan a papia tocante e posibilidad pa Cuerpo di Polis di Aruba por controla a base di ley di admision y expulsion pa asina intensifica e control pa loke ta trata status di personanan, si ta ilegal of no.
Tambe, el a recorda cu e sistema ESTA (Electronic System for Travel Authorization) proximamente lo drenta na vigor, den esaki el a bisa cu nan lo institui un sistema electronico pero nan por dicidi tambe cu nan ta bay trata y otorga un cantidad limita di ESTA pa e personanan por drenta, pa motibo cu pais ta confronta cu e situacion preocupante di halto indice di personanan cu nacionalidad Venezolano cu ta falta respet pa e leynan penal.
Den e linea aki, el a comenta cu nan a haci un evaluacion conhuntamente cu AHATA y Jewels Association pa motibo cu nan a ripara cu diferente victima di atraco ta joyerianan.
Ademas, Minister Bikker a bisa cu nan ta bay concentra riba e medida di siguridad pa loke ta trata diferente establecimento, pa motibo cu nan kier conscientisa no solamente comercio sino cu tambe comunidad en general cu siguridad ta un responsabilidad comparti y den esaki nan lo reuni pa wak kico nan mes a pone ‘den place’ unda por mehora esey y por introduci e accesibilidad of eventualidad na unda un of mas persona por yega na intencion di purba di comete un atraco.
Di mesun forma, minister a manifesta cu pa hopi biaha e personanan den comunidad no ta compronde con serio e ta te ora cu atende cu personanan cu kier bin establece na Aruba, ta hopi preocupante den ora cu nan ta drenta como turista y despues nan ta keda, p’esey ta existi e maneho cu solamente cierto categorianan di persona por bin warda nan prome permiso akinan.
El a splica cu pa e motibo aki, ora un turista ta drenta no sa si e tin un pasado hudicial, ora cu nan permiso cu nan mester permanece den exterior, nan mester entrega di antemano cu su permiso nan pasado hudicial.
