Ayera dialuna, Uruguay a expresa su ‘preocupacion profundo’ pa e situacion cu a sosode diadomingo ultimo na Parlamento di Venezuela y ta considera cu ‘actitud di Gobierno’ di e pais ey ‘ta daña seriamente e esfuerso pa promove dialogo’.
Segun e nota, Gobierno di Tabare Vazquez ‘ta expresa su preocupacion profundo pa e violacion di derecho di e diputado di Asamblea Nacional Venezolano cu a impedi cu representantenan legitimo eligi pa pueblo por participa den e sesion’.
E Ehecutivo Uruguayo den su comunicado ta pidi ‘tur actor Venezolano, pero den special Gobierno’ pa evita accionnan ‘cu lo continua cu un situacion pio y pone den riesgo e stabilidad di e pais’.
Di su parti, e presidente recien eligi Luis Lacalle Pou, a califica di ‘golpi di institucionalidad democratico’ loke a sosode diadomingo ultimo na Venezuela.
‘E hechonan cu a sosode na Venezuela y a impedi e funcionamento normal di Asamblea Nacional ta constitui un golpi nobo pa institucionalidad democratico, demostra un biaha mas e maniobra di e regimen di Maduro pa centralisa e poder, violentando e boluntad popular’ el a skirbi na su cuenta di Twitter.
Tambe e canciyer designa, Ernesto Talvi, a usa e red social ey pa condena ‘e accionnan contrario pa e legitimidad di constitucionalidad’’.
Uruguay, igual cu Mexico, a pidi ‘dialogo’ entre Gobierno di Nicolas Maduro y oposicion pa soluciona e crisis den e pais ey.
