Ultimo biaha cu un astronauta a cana riba Luna tabata casi 50 aña pasa. Awo, NASA tin un plan pa bay bek – y yuda humanidad pone su mira riba destinacionnan mas leu den e proceso.

E programa Artemis ta e prome mision lunar cu tripulacion di e agencia den decadanan. E ta carga peso historico riba su lomba.

Den mitologia Griego, Artemis ta e diosa di Luna. Ademas e ta e ruman morocho di Apollo, e dios Griego y Romano antiguo, pa ken NASA a nombra su prome misionnan lunar. E simbolismo ta intencional: NASA ta spera cu e programa lo trece e prome muhe na Luna.

E plan ta pa hib’a e muhe na Luna pa aña 2024 – un fecha cu ta cumpli cu presion di Cas Blanco. Pero preocupacion pa tempo y presupuesto a plaga e mision. A pesar di e retonan aki, administrado di NASA, Jim Bridenstine a bisa cu e agencia por haya un manera pa hiba un mision na Luna dentro di e fecha limite.

Artemis tin varios meta. NASA tin plan pa uza companianan Mericano pa haci entrega na superficie lunar como preparacion pa misionnan humano. Despues lo uza e Space Launch System, e raket mas poderoso cu ta existi, pa manda e astronave Orion riba un mision test den orbita lunar y mas leu. Despues, NASA tin plan pa manda un tripulacion den orbita y eventualmente riba e luna mes. Tin plan pa un modulo di comando di orbita di luna, Gateway, tambe.

Tur e actividad aki ta diseña pa yuda cientificonan siña mas tocante Luna, incluyendo su Polo Sur, nunca explora, unda ta kere tin deposito di ijs cu e agencia ta spera di studia y eventualmente uza.

E proyecto ta enfoca riba exploracion lunar, pero tin un meta mas grandi. NASA kier uza Luna como un suelo pa test. E plan ta pa uza e tecnologia y ciencia cu lo test durante Artemis pa duna impulso na un futuro mision cu tripulacion na Mars.

Ta un prospecto curisio – pero fondonan y tempo lo determina destino di Artemis. NASA a ricibi menos placa di locual a pidi pa 2020, y recientemente a haya problema cu contratista Boeing riba si mester agilisa un upper stage di e raket cu lo hiba astronautanan Luna. Como resultado, no ta cla si Artemis lo desplega segun plan.

Por haya mas informacion di Artemis – y e tecnologia necesario pa realis’e – na nasa.gov/artemis.