Pashent cada bes mas jong di diabetes tipo 2

Praktijk Ondersteuner Huisarts (POH) ta duna informacion tocante diabetes tipo 2 den comunidad. Pashentnan di e malesa ta cada bes mas jong, no na Aruba so pero mundialmente. Tambe mester keda enfatisa pa hende cambia nan estilo di bida y haci mas movecion.

Jasmira Mora, coordinador praktijk ondersteuner, a duna informacion tocante Dia Internacional di Diabetes. Nan ta trahando bou di Wit Gele Kruis pa purba yega na haya mas hende cu ta posibel.

Pa dia internacional tabatin e posibilidad pa check sucu gratis. Nan sa cu tin hende cu ta cana trankil sin sa cu nan tin sucu, of pa motibo di nan trabou y di ta hopi ocupa, ta bira dificil pa haci un afspraak cerca dokter di cas.

Ta importante pa check y keda controla pa haci test, ‘e ta algo facil’. Den cuadro di Dia di Diabetes, Wit Gele Kruis y POH ta duna chens pa otro instancia manera Ibisa, ImSan tambe por haci chekeo.

POH ta traha directamente cu dokter. Mora ta splica cu e problema di diabetes ta uno serio, mirando cu edad di e pashent ta keda disminui. “E caso ta birando serio. Ta di lamenta, pero esey no ta na Aruba solamente, pero mundialmente. Ta asina cu cada biaha mas hende hoben ta haya e malesa.”

Mora ta splica cu esey principalmente tin di haci cu cultura, estilo di bida cu hende ta bibando. Awendia ‘tur hende ta druk’, nan no kier of por come na tempo, sino ta prefera come riba caya. Ambos mayor ta trahando y ta duna mucha come fast food y asina e diabetes tipo 2 por cuminsa. Alimentacion ta e factor ‘cu por tin mas influencia’ riba desaroyo di e malesa.

E problema ta, cu mientras no ta hereda e malesa, si ta hereda estilo di bida, y aki ta unda mayoria di problema ta sinta. E falta di comemento saludabel y falta di movecion ta e causa cu hopi biaha hende ta yega na e malesa mas lihe.

Diabetes tipo dos tin e nomber pa ‘ouderdom diabetes’, pero den actualidad no mas, pasobra por tin pashent hoben. Esaki sin inclui e pashentnan cu ta nace cu malesa di sucu. “Esey ta ora un pashent nace cu problema di insulina, anto e ta haya tratamento cu internista y specialista.”

Mas tanto ora ta papia di pashentnan hoben ta trata di esunnan cu tin 20 aña di edad of mas. No ta facil pa un persona cu tin 20 aña comiendo malo y un estilo di bida no adecua cambia asina facil, e ta algo cu ta rekeri guiansa.

Nan ta purba di papia cu e persona y motiva, ‘nos ta bira manera coach’. Den opleiding nan ta haya motivacion, cu ta parti esencial den e begeleiding. Mayoria di trabou ta consisti di esey.

“Tin cu purba laga e persona di su mes wak kico ta importante p’e. Locual ta trata su hechonan, cua consecuencia lo tin riba su sucu, tur e escogencia cu e ta haci. Na final di dia nos ta duna informacion, pero si abo haci e escogencia robes, e ora ey bo no ta drecha e sucu.”

POH ta keda informa publico tambe tocante importancia di movecion. Mora ta enfatisa cu no solamente ta trata di come bon, pero mester keda activo. Sea cana of core, varios departamento y organisacion ta organisa caminata y marathon, y ta importante pa participa.

POH tin pensa di bin cu un grupo di movecion pa POH, pa asina keda stimula pashent riba diferente actividad ‘pa asina nan cana hunto cu nos’. Nan lo sigui duna charla den algun centro di bario tocante presion halto y sucu pa brinda e informacion.

Ta duna charla segun edad, manera hende riba 50 y 60 + pa nan por siña trata cu nan sucu y baha e remedi, tambe nan ta yama hende activamente. Pa asina pashent no lubida cu nan tin afspraak ‘pasobra esey sa pasa’. Nan ta lubida nan cita.

Di parti di Wit Gele Kruis, mayoria di hende ta haci flyers. Nan ta purba di promove mas hopi riba radio, propaganda y conhuntamente cu PRISMA diabetes, pa asina yuda e pashent. Mora ta expresa cu tin mas disciplina uzando e Prisma. Segun Mora, e POH ta un parti cardinal den e training di educacion.

A puntra Mora, cu si den algun caso e pashent cu diabetes tipo 2 no mester keda bebe remedi si e cambia su estilo di bida of come bon y haci movecion. E ta contesta cu nan por yega na cierto momento di bisa e por ta posibel, pero mester tin cambio drastico den nan manera di come.

Tin algun pashent na Aruba cu a stop remedi of baha nan, pero nan ta wak nan estilo di bida a cambia y ta haci un diferencia den su bida den e comemento y movecion.

Dianan recien, POH ta yama pashent cu diabetes tipo 2 cu ta interesa den e hangua di griep, mirando cu e grupo di pashent cu sucu tin riesgo halto cu por haya influenza, persona di edad mas halto ta cay den risico pa haya e griep.

POH lo sigui yama nan pashent activamente. DVG tin e hangua di griep y POH ta purba pa tin e rol mas activo den comunidad pa duna informacion necesario na e pashent.