Casi na bispo di fin di aña, gobierno a anuncia un rebaho riba cambio di tarifa di inkomstenbelasting y loonbelasting, loke nan a cualifica como un ‘bon noticia.’ Pero tambe nan a anuncia cambio riba e reforma fiscal cu ta na caminda pa asina logra den presupuesto 2020 e meta di un surplus di 25 miyon florin, manera ta para den e norma di supervision financiero LAft y e protocol firma cu Hulanda.

Minister di Finansa, Economia y Cultura, Xiomara Ruiz-Maduro a referi na Bon Dia Aruba riba algun cambio den e ley di reforma fiscal cu ta na caminda.

Cambionan reforma fiscal.
“E reforma fiscal tin biaha nan ta dun’e un mal nomber, pero e ta algo bon,” el a declara. Aunke e ta haya cu e ta exigi curashi pa por haci e cambionan, pero consciente cu e liña cora ta pa Aruba por resulta beneficia. Kiermen pa pais Aruba por bay na un ‘sistema cu ta mas simpel y mas husto.’ Pues tin beneficionan den e reforma fiscal, pero tin biaha bo no ta bay wak nan di biaha, el a indica.

El a declara na e matutino aki cu e presupuesto di pais Aruba pa 2020 mester conoce un surplus, ya cu esaki ta un punto cu gobierno di Aruba a yega na un acuerdo cu Hulanda. Pero apart di e acuerdo aki, e ta un meta pa nos mes como pais. El a splica cu pa añanan pais Aruba a tene hopi deficit cu a conduci cu mester fia placa afo cu ta genera mas interes riba e debe nacional.

“Tanten cu nos no ta subi otro caminda pa yega na surplus pa poco poco nos baha e presion di locual ta bira e debe ariba nos pais y sigur e debe riba nos economia,” el a bisa.

Pues e ta haya cu Aruba mester di su surplus, ya cu e por bay pio pa nos tur, si no bin cu un maneho riba finansa cu tin biaha no ta mucho popular, pero si necesario. Por ta e cambio di ley riba reforma fiscal cu lo yega parlamento pronto lo wordo mira como hopi serio, ‘pero tin cosnan cu ta hopi mas serio si bo ta keda sin haci y tuma e cambionan necesario akinan.’

E trankilidad cu e por expresa dilanti di e cambio cu lo bini ta cu gobierno ta trahando pa bienestar di tur den e pais aki, entre nan aumento di salario minimo y aumento riba pago di pensioen. Tambe a logra baha e prijs di coriente no solamente pa e sector residencial sino comercial tambe. Y aunke e cambionan cu ta na caminda riba e reforma fiscal no ta na gusto pa tur hende, nan ta purba di bin cu un balansa, pa ‘no duna un caminda di mas y otro caminda di menos.’

Deviezenprovisie.
Un di e cambio tin di haci cu gobierno ta aumenta cu 0,6% e deviezenprovisie entrante 1 di januari 2020. Nos ta pendiente ainda di un calculacion di cuanto e aumento di e deviezenprovisie lo por genera pa caha di gobierno. Pero si e no ta yena e buraco cu e no introduccion di e sugar tax a laga atras -asina e mandatario a bisa na Bon Dia Aruba- ya cu e sugar tax tabatin diferente escenario. Y aunke e tempo ey gobierno no a tuma un decision riba e diferente scenarionan, pero si nan a yega di presente na e gremio comercial.

E deviezenprovisie ta un sorto di comision destina pa caha di gobierno na momento cu bo ta haci un pago of transaccion for di bo cuenta bancario sea na florin of un otro valuta.

E cambio den e ley fiscal aki no solamente tin di haci cu e companianan entre otro cadena di hotel, ora di manda nan ganashi produci na Aruba, pa nan compania madre den exterior. Sino cu pueblo tambe mester contribui cu caha di gobierno ora cu ta paga nan credit card of cumpra dollar for di banco. “E ta un subida den esey,” el a bisa. Aunke gobierno a yega di duna cierto beneficionan, pero tin caminda cu mester subi, pasobra gobierno na fin di dia mester yega na e fondonan pa gobernacion por lora na bienestar di full pais, el a bisa.

E mandatario a indica cu mester a busca e avenidanan pasobra nos mester yega na e surplus. Ora cu sugar tax y royalties a cay, ta bira un reto pa gobierno busca alternativanan. Den e caso di e deviezenprovisie, gobierno por a mira un espacio pa subi di 1.3% pa 1.9%.

Si e introduccion riba aumento di deviezenprovisie tabata un sorpresa pa gremio comercial, e mandatario a bisa cu dia cu nan tabatin un stakeholder meeting, e punto di deviezenprovisie, no tabata parti di dje. E motibo tabata -segun e minister- cu nan tabatin otro cosnan den planning. Y esaki ta algo cu segun minister Ruiz-Maduro, el a yega di bisa despues na directora di Atia, Michele de Groot. Pero ora cu gremio comercial a indica pa gobierno tene consideracion riba kico como gremio nan ta trece dilanti, e ta haya cu gobierno tin un responsabilidad pa por caba di cera e presupuesto 2020.

Nan mester por a sondea otro caminda por ehempel subi BBO cu un 1%, pero e no ta descarta cu seguramente tambe lo bin resistencia. Ademas e mandatario a bisa cu for di comunidad nan por a scucha cu hopi di e placa produci na Aruba ta bay afo. Hopi di nos divisa ta bay afo y tambe hopi remesa, y esaki ta un manera cu gobierno por catch un parti di e placa aki. Un placa cu toch ta keda pa e por draai den economia di nos pais.

Encuanto si esaki lo tin su impacto riba costo di haci negoshi riba nos isla, of otro tipo di impacto. Minister Ruiz-Maduro no ta desconoce cu cada impuesto cu ta wordo cambia of ta wordo introduci tin su efecto. Por ehempel si nan a bin cu sugar tax of royalties e no ta duda cu tabatin zundramento. “Tur caminda un hende no lo keda gustoso, pero gobierno tin cu goberna pa bienestar di pais Aruba,” el a bisa.

E ta haya cu no mester desconoce cu den full aña den e reforma fiscal tabatin cambionan cu a yuda comunidad, entre otro un grupo a haya un alivio riba grondbelasting, pero tambe otro grupo mester paga mas hopi. Pero di otro parti comercio a haya parti di e dividend belasting y cu nan a saca probecho di dje. P’esey nan a larg’e e aña aki.