Mas informacion di pashent, mas personal y e introduccion di revalidatietraject, esaki ta e recomendacionnan di reumatologo Rashidi Rellum pa continua mehoracion di cuido di reuma pa Aruba.

Segun un relato den corant Amigoe dia 30 di december ultimo, for di cuminsamento di aña pasa e ta un specialista den centro di reumatologia di Horacio E. Oduber Hospital. E ta calcula cu na Aruba tin alrededor di 2,800 pashent cu ta padece di un forma di artritis reumatoide.

E centro di reumatologia di hospital a ser lanta segun protocol Hulandes. A tene tres sesion di informacion riba reuma den MFAs, cual tabata miho bishita di locual a spera. “Pues pa mi e nochi di informacion tabata hopi exitoso”, Rellum a bisa Amigoe. No unicamente a duna informacion na pashent, sino tambe kico e persona mes por haci despues di un diagnostico, y con importante actividad fisico ta. Ademas, a duna e pashentnan suministro y un manera miho pa come. Un cuminda vegetariano of vegan ta preveni brota. Rellum a presenta tambe su prome hallazgonan di poblacion di pashent na Aruba.

A base di e pashentnan cu el a mira te awo, a haci un calculo. Alrededor di 840 persona, esta 30% di e pashentnan, tin artritis reumatoide/ artritis psoriatica/ ankylosing spondylitis. 560 persona, esta 20 porciento, ta sufri di artrose. 420 pashent, esta 15% ta sufri di jicht. Otro 420 pashent ta sufri di fibromyalgia, y otro 10 porciento ta sufri di malesa sistematico, manera SLE, sclerosis, myositis, vasculitis y firbosis di pulmon: en total 280 persona. Ademas na e momentonan aki tin 10 pashent di reuma cu ta mucha.
Alrededor di 10 porciento di e bishitantenan na reumapoli ta resulta di no sufri di e malesa.

Rellum ta ricibi alrededor di 3300 bishita di pashent cada aña na reumapoli, posiblemente mas, pasobra un cantidad di pashent ainda ta bay cerca otro specialista y anualmente ta añadi mas pashent.

Alrededor di 10 aña pasa, a traves di investigacion na Erasmus MC na Rotterdam a haya pa compronde cu hende mester trata reuma lo mas trempan posibel y lo mas duro posibel, pa preveni daño na organonan, segun Rellum. “Mas lihe bo tene e brota bou control, menos pisa e remedi cu bo mester duna den futuro.” El a conta cu e tratamento aki ta maneha internacionalmente, pues tambe na Aruba.

Cerca algun persona, e medicina popular pa reuma no ta eficiente, y nan mester a tuma medicina hopi mas fuerte, e asina yama ‘biologicals’ of DMARD (disease-modifying anti-rheumatic drugs) traha di extracto di proteina humano. Esakinan ta costa casi 30mil florin pa persona pa aña. Na Aruba tin 168 pashent cu tin mester di e medicina special aki. “Sin e medicina aki, e brota ta keda activo y daña organonan sin cu por cura esakinan. Esey ta nifica cu hende cu por lo demas ta saludabel no por bay traha ni funciona normal den sociedad”, segun Rellum.

E logro di mas grandi den cuido di reuma ta yega a traves di revalidatietraject pa artrose. Esaki pasobra artrose ta e forma mas comun di reuma. E bishita na reumapoli ta forma apenas un parti di e cuido aki, hopi pashent di artrose ta cerca nan dokter di cas of otro specialista. “Artrose tin hopi impacto riba bida di e pashent, cu tin hopi keho di dolor.” E kier contribui na introduccion di un revalidatietraject. Aki hende por ricibi terapia di ehercicio, fisioterapia y informacion adecua di e malesa, su trayecto y su expectativanan. “Hende mester compronde cu tin dolor, pero cu ta hopi importante pa haci movecion di e manera corecto.” Ademas, fisioterapia casi nunca ta ser ofreci na Aruba. Ergoterapia masha poco, y podoterapia ainda no. E ultimo aki ta trata di zuela adapta y sapato special, cual ta caro.

Guia adecua ta importante pa pashent di artrose, cu awo ta hopi comun den reumapoli. “Esey ta un cuido caro y innecesario”, segun Rellum. E pashentnan aki por wordo yuda miho den un revalidatietraject. “No unicamente e revalidatietraject, pero tambe informacion pa pashent tambe mester ta miho.” Tin plan pa un website pa pashent cu diferente idioma, y tambe e aña aki lo lanta un asociacion si pashent independiente. “Pashentnan kier ta den contacto cu otro, y si e informacion aki ta centralisa, e pashentnan tambe ta haya mas siguridad riba kico ta spera nan y ta haya bon tip y triki pa biba cu reuma.”

Rellum kier cu e Centro di Reumatologia alcansa e nivel di calidad di un clinica top na Hulanda. Den un clinica asina, un cita ta realisa na un nivel halto di calidad y siguridad, hasta di banda di hospital mester haci un tiki investigacion, el a splica. “Te cu mi sa, nos no tin esaki, pero mester ta un bon meta.”

Pa e Centro di Reumatologia por funciona optimal,mester tin dos reumatologo vast y un enfermero special pa reuma., “Cu esaki nos por duna un cuido hopi miho sin mester haci esaki asina caro”, el a bisa. Un enfermero di reuma tin mas tempo pa duna splicacion na e pashent riba e diagnostico y con e medicina ta traha. Un pashent cu a ricibi diagnostico di reuma ta ricibi un noticia fuerte, y e enfermeronan por duna un bon guia cu esaki.