Aña nobo a habri, y hopi di nos lo tin resolucion pa come mas saludabel den aña 2020. Den esaki, come local por tin un influencia. Den nos edicion di ayera nos a conta un tiki tocante e propiedadnan nutritivo di frutanan di Aruba. Aki bou, algun berdura local cu lo yuda mantene un dieta saludabel.
Concomber chikito
Esaki ta un sorto di ‘squash’ local, pero ta parce un concomber cu cuero cu spina. E sabor, sinembargo, ta mas marga cu concomber y e berdura ta mas cortico. Paden tin un pulpa suave y simia, igual na un concomber. Concomber chikito ta crece riba e isla y ta ser uza den salada y stoba, of riba su mes cu binager. E berdura aki ta contene varios vitamina B, incluyendo B1, B5 y B7 (biotin). Vitaminanan B ta conoci pa alivia sentimentonan di ansiedad y mitiga efectonan dañino di stress. Ademas, e berdura aki ta rico den un di e elementonan mas basico necesario pa un digestion sano: awa y fibra. E ta disponibel henter aña.
Jambo
Famia di okra, tambe conoci como ‘lady’s fingers’, un mata berde cu flor. Okra ta pertenece na e mesun famia di mata cu hibiscus y catuna. Un cuminda clasico faborito di Aruba ta sopi di jambo. Pa largo e ta un faborito di hende preocupa pa salud. E ta contene potasio, vitamina B, vitamina C, acido folico y calcium. E tin tiki caloria y un contenido halto di fibra dietetico. Recientemente, un beneficio nobo di inclui okra den bo dieta ta ser considera. Okra ta sugeri pa yuda maneha sucu den sanger den casonan di diabetes tipo1, tipo2 y gestacional. E ta disponibel henter aña.
Bonch’i Cunucu
Un bonchi chikito y largo, herbi pa come acompaña of como snack. Bonch’i cunucu tin un textura crunchy – mas cu snap beans – y un sabor cu ta recorda asparagus. Ademas di cushin’e den cuminda como sopi, salada y stir-dry, bonch’i cunucu ta bon pa stoba, hasa, sauté y hasta frita. Ora di cushina, e sabor ta intensifica. Nan tin tiki caloria, alrededor di 45 caloria pa un cup, y ta rico den vitamina A. Tambe ta contene vitamina C y potasio, y ta disponibel henter aña.
Pampuna
Den eterno berano di bida Caribense, nos ta preocupa nos mes unicamente cu temporada seco y temporada di yobida. Toch nos mester disfruta ampliamente di e placer di pampuna y disfruta receta Caribense di pampuna henter aña. Un platillo popular den restaurant Arubiano ta sop’i pampuna. Pampuna ta rico den antioxidante flavonoid polyphenolic, manera xanthin, lutein y caroten, y tambe tin vitamina. Simia di pampuna ta rico den omega-3, vitamina, mineral y proteina. Por uza pa traha cos dushi, pan, y sopi.
