Aña 2019 pa Stichting Monumenten Fonds Aruba (SMFA) tabata uno masha fructifero.

Bon Dia Aruba a sostene un entrevista cu directora di SMFA, Anne Witsenburg y tambe cu Mircla Nava, kende ta encarga cu e parti di PR, marketing y seccion educacion di e fundacion aki, tocante e resultado di e aña pasa. Pero un punto cu a resalta tin di haci cu importancia di informacion historico pa ehecuta un proyecto di restauracion di un edificio monumental.

Nava a bisa cu e fundacion por a mira atras un biaha mas na un aña exitoso, caminda nan ta hopi satisfecho di loke nan por a logra durante e 12 lunanan ey.

Uncle Louis Store.
Un logro importante tin di haci cu e restauracion di dos monumento: Uncle Louis Store y Forno di Calki na Rancho. Pa loke ta e prome monumento, e ta canando hopi bon y e personanan cu a yega di pasa den e area di Uncle Louis Store por mira cambionan grandi. E meta ta cu na principio di e aña aki e lo ta completamente restaura.

E edificio aki di añanan cincuenta lo bira e oficina nobo di Directie Natuur en Milieu (DNM). Navas a bisa cu nan a pone hopi enfasis riba e parti di energia solar, pero tambe e lo tin su propio sistema di uzo di awa recicla pa e toiletnan y un green wall.

Investigacion historico.
E ta un proyecto cu a demanda un investigacion riba historia di edificio y su doño original, Sr. Leon Waitzberg. “Nos ta considera historia tras di monumento hopi importante. E ta agrega un balor sumamente grandi na locual ta e monumento,” Nava a bisa.

Directora di SMFA, Witsenburg a remarca cu durante e proceso di restauracion, y a base di investigacion realisa, ainda nan mester a cambia algun cos cu nan no tabata sa precies con e situacion tabata. Pero a base di potretnan bieu, colornan y recuerdonan di hende, nan por a logra e cambionan aki.

Por ehempel, ora cu nan a cuminsa, nan no tabata sa precies unda e parti di cushina y sala tabata aden di edificio. Pero danki na e colaboracion di e famia y ex trahadonan di Uncle Louis Store, nan a logra compila hopi informacion cu a influencia e proceso di restauracion di edificio.

Nava a agrega cu akinan nos por mira importancia di historia tambe pa un tipo di proyecto asina. Nan tin otro sorto di proyecto cu nan ta trahando riba e diseño di dje, den cual tambe e fundacion aki por mira e importancia di informacion di hende cu a biba of traha den e edificio. Ta trata di edificio di Ex Botica Aruba den Steenweg.

E plan ta pa e aña aki cuminsa cu locual ta e restauracion di e parti exterior di e edificio. Di e edificio aki tambe SMFA a laga haci un investigacion di su historia, cual tabata originalmente di Sr. Addison Croes cu hunto cu Sr. Gustave Nouel a cuminsa akinan cu Botica Aruba.

Forno di calki na Rancho.
Otro proyecto di restauracion cu SMFA ta sinti su mes hopi orguyoso di dje ta e forno di calki na Rancho. Un restauracion cu por hopi aña tabata e deseo di comunidad pa bira realidad, pero debi na e fondonan, tabata dificil pa nan por ehecuta e proyecto mas prome. Pero danki entre otro na fondonan di Aruba Bank y VNO, nan a logra restaura esaki completamente. Esaki a wordo combina cu un curso di uzo tradicional di calki riba monumentonan. Ainda falta pa ainda e proyecto wordo finalisa completamente.

Witsenburg a laga sa cu hopi satisfaccion cu Stichting Rancho tin e yabi di e monumento aki pa nan organisa nan tournan den e bario historico aki cu ta inclui e forno como un di nan atraccion. Ainda nan tin pendiente un reunion cu Monumenten Bureau pa delibera riba algun aspecto di e proyecto. E ta spera cu pa e luna aki nan por bin full cla cu e proyecto aki.

Directora di SMFA a bisa cu ta falta un par di cosnan chikito, manera e hekinan. E ta consciente cu eventualmente no tur hende a keda contento cu e restauracion aki. “Mi tin cu bisa cu na tur proyecto di restauracion bo tin cu scoge e solucion cu ta mas autentico y cu tambe ta preserva e monumento pa futuro generacion,” Witsenburg a bisa.