Dia 31 di december, ultimo dia di aña, trahadonan di Kong Hing Super Center a haya un carta, door di e doñonan mes di e supermarket, cu e tristo noticia cu nan ta den kiebra.
E carta aki, cu no tin firma di e doñonan, ta specifica cu e gerencia a purba cu Kong Hing Super Center pa añanan pa evita cera nan porta. pero esey a resulta dificil. Nan no tin placa pa paga su trahadonan, te incluso nan a expresa cu cierto trahado no a haya nan salario di luna di december.
Den e carta, tambe ta splica cu dia 6 di januari, ora Corte di Husticia habri su portanan, lo pidi e bancarota di establecimento aki y tur asunto pendiente lo wordo trata door di un curator, semper apunta pa un Hues.
Bon Dia Aruba a tuma contacto cu Ramiro Dubero, ken ta un di e trahadonan den area di carniceria. El a expresa cu dia 31 di december, tur trahado tabata traha di manera normal, ora nan a haya e carta. Tabata un sorpresa pa nan, pa motibo cu e doñonan por sinta y papia cu trahadonan pa splica e situacion malo cu nan ta atravesa aworaki y no ricibi un carta manera nan a hay’e.
Tambe Dubero a comenta cu nan por a mira cu e benta a cay hopi y nan no tin productonan pa bende. “Na luna di december tur hende ta bende. Anos no a haya ni ham di Pasco, ni un galiña pa bende pa clientenan”, Dubero a sigura.
Ayera, e trahadonan tabatin e di dos dia sinta pafo wardando algun tipo di contesta di e doñonan, pa motibo cu nan a presenta pa traha, pero e portanan di e luga ta sigui cera for di 31 di december pasa.
“Nos no ta bay yama nan tampoco, pa motibo cu nan ta doño y nan mester ta responsabel y tin balor pa bo trahado. Bo no por trata bo trahadonan manera ta animal nos ta”, Dubero a comenta.
Di mesun manera, el a bisa cu nan ta 22 empleado y varios di nan tin mas di 20 aña trahando cu e compania. Loke nan ta pidi ta pa e responsabel di establecimento duna un splicacion kico lo pasa cu nan.
Ademas, el a informa cu awe nan lo bay haci mesun cos, presenta na e sitio den orario di trabou y warda, pa demostra cu nan tin intencion di traha. Dialuna nan lo bay pa Ministerio di Labor cu e carta cu nan a ricibi pa nan haya sa kico ta e pasonan cu nan mester sigui.
Alvin Dirkzs cu tambe ta trahado di e luga aki, a duna di conoce su mal contento. Esaki pa motibo cu el a traha 23 aña na e luga, pero ‘tur e cos aki a shock nos diripiente. Nos sa cu cosnan ta bayendo malo, pero tene reunion cu nos’, el a bisa.
El a trece dilanti cu e situacion ta hopi dificil p’e, pa motibo cu ‘tabata fin di aña, tin debe cu banco, yiu pa cria y na e momentonan aki, mi man ta bashi cu debe so’, manera e mes a expresa.
Bon Dia Aruba tambe a bay bishita otro establecimento na caya Havenstraat cu ta pertenece pa e mesun doñonan pa haya un declaracion di nan. Karim Jie A Swie, persona encarga di e luga, a splica cu na e momentonan aki, nan no por ofrece detayenan di loke a sosode, pa motibo cu nan ta bezig cu nan abogadonan.
Di mesun manera, Bon Dia Aruba a tuma contacto cu ekipo di Minister di Labor, Glenbert Croes pa haya informacion tocante esaki, pa loke nan a contesta cu Croes ta lamenta e situacion aki y a tuma nota di e carta cu empresa a entrega pa su empleadonan. Den proximo dianan e lo tuma contacto cu DAO cu instruccion pa duna tur asistencia y apoyo pa e trahadonan, pa asina sigura nan derecho acumula y adkiri wordo honra y respeta.
