Lider di fraccion di MEP, Rocco Tjon a elogia con parlamento ta bin realisando nan tarea di control. Aña 2019 el a hay’e uno ‘positivo’ tambe pa parlamento su rol di control di gobierno.
Den esaki el a referi na e control cu e organo legislativo a haci riba e Social Crisis Plan cu gobierno a mantene na dje. “Nos a controla esaki durante e aña. Mescos ta conta esaki pa presupuesto”, segun e lider di fraccion di MEP.
Durante 2019 un topico cu no por keda afo ta e situacion di Venezuela, cu a demanda hopi atencion y tempo di parti di gobierno y parlamento. El a laga sa na Bon Dia Aruba cu parlamento di Aruba durante tur nan participacion den reunion interparlamentario di Reino Hulandes (IPKO), pero tambe den tur conferencia y congreso internacional, e asunto di Venezuela y su impacto pa nos isla, tabata un topico cu tabata bin bek. Igualmente den e reunion cu e partnernan tabata wordo analisa e impacto di e situacion cu e bisiña pais pa cu nos economia y siguridad. Esakinan sin desconoce e aspecto humanitario rond di dje. Pa atende cu e situacion aki tin diferente leynan cu a wordo introduci y un di nan tin di haci cu asunto di asilo. Esaki pa mitiga e riesgo cu e situacion na Venezuela por trece pa nos pais.
Leynan pa 2020.
Den nan agenda di otro aña tin varios ley pendiente cu a cuminsa cana su caminda legal y entrante e aña aki nan lo wordo trata. Entre nan un paso importante tin di haci cu fortalecemento di nos estado di derecho. Pa gobierno por haci esaki tin diferente ley cu mester wordo trata y ya caba nan a cuminsa e trabou aki. Entre otro el a menciona e ley di ‘ombudsman’ of defensor di pueblo. Tambe nan a logra finalisa tur cos pa loke ta e ley di screening di minister y parlamentarionan; y e ley di financiamento pa partidonan politico.
“Tur e tres leynan aki ta cla aworaki y na comienso di aña –segun Tjon- nan lo wordo trata. Nan ta pasonan cu e ta considera como ‘hopi importante’ pa trece cambio den politica y restaura e confiansa cu pueblo tin den politica.
Como fraccion mes, nan a yega di entrega un ley di iniciativa pa proceso di identificacion bira obligatorio y tambe eleva siguridad den trafico, nan ta cambionan cu lo wordo trata na inicio di 2020. Hunto cu nan e anuncio cu gobierno a haci di introduci un registro pa loke tin di haber cu integridad. E ta haya esaki sumamente importante mirando e reportahe cu a wordo a saca riba e grado di corupcion, con esaki ta wordo percibi pa nos comunidad.
Finalmente lider di fraccion di MEP a expresa su deseo di Bon Aña pa henter comunidad di Aruba.
