Nature Foundation St. Maarten a ricibi un reporte preocupante tocante un derame di diesel fuel na e pond di Dawn Beach dilanti di The Westin St. Maarten Dawn Beach Resort and Spa diabierna dia 27 di december ultimo.
Nature Foundation a yega na e escena y a descubri un area seriamente contamina, incluyendo parha y pato cubri cu azeta y diesel fuel. Tabatin aproximadamente 25 liter di diesel fuel y azeta hidraulico flotando riba superficie di e awa di e pond.
Un truck di colecta desperdicio tabata para banda di e pond. Hende den e area a bisa cu mecaniconan tabata trahando riba e truck a benta e azeta den e pond, segun Nature Foundation a bisa diasabra. A retira e truck durante weekend.
E pond, afecta fuertemente pa e derame, ta cas di turtuga, iguana, pato, paloma, cangreu y variedad di especie di pisca. Nature Foundation a monitor e situacion den weekend pa mira si algun animal lo muri, pero a bisa cu mester tuma accion urgente. Varios parha y pato tabata yen di diesel y azeta. Segun e fundacion, pa parhanan ta hopi dificil pa recupera di incidentenan asina.
Boluntarionan a traha pa limpia e luga y move e animalnan, y niun a muri te momento di e reporte. E fundacion a bisa cu a traslada nuebe turtuga na Seaside Nature Park.
Den un esfuerso combina cu Sea Shepherd Conservation Society, Ministerio di Vivienda Publico, Desaroyo Teritorial, Medio Ambiente y Infrastructura VROMI, Freegan Food Foundation y otro boluntario, a pone pad absorbente, mat y boom pa retira algun sludge for di e awa, y un truck di pos di VROMI a skim e diesel y sludge for di e awa.
