E asesinato di lidernan social na Colombia no ta duna chens den Pasco. Dia 24 di december a duna di conoce e morto di Lucy Villareal, ken tabata integrante di e Fundacion Cultural Indoamericanto, cual ta haci parti di e ‘Carnaval de Negros y Blancos’ di e ciudad di Pasto, un di e festividadnan mas famoso di e pais.
Segun e prome version, Villareal, ken tabata mama di dos mucha menor di edad, a ser ataca pa varios homber arma ora e tabata transita pa e caretera cu ta conecta e capital di departamento di Nariño cu municipio Tumaco. Camilo Romero, gobernador di e departamento, a bisa cu e muhe a finalisa caba un tayer pa muchanan den e zona di Llorente. Sinembargo, e detayenan di e crimen ta sin resolve ainda. Di acuerdo cu e ruman muhe di e victima, e morto di Lucy a tuma nan pa sorpresa, pasobra nunca a ricibi menasa.
E caso di Villareal no ta e unico cu a haci e celebracion di Pasco na Colombia mas scur. Dia 23 di december, na costa di Caribe Colombiano, autoridadnan a haya e curpanan di un pareha di ambientalista recien casa cu tabata desapareci desde 3 dia pasa. Natalia Jimenez y Rodrigo Monsalve tabata caminda di Santa Marta pa municipio di Palomino na departamento di La Goajira, pa celebra nan ‘honey moon’. Aunke principalmente por trata di un secuestro, e sitio unda a haya nan curpa ta causa conmocion riba rednan social pa exigi husticia y cambio den e problematica di asesinato di lidernan social.
Di acuerdo cu Fundacion di Desaroyo y Paz (Fundepaz), e asesinato di Lucy Villareal ta aumenta na 22 e cifra di lider social asesina na departamento di Nariño den aña aki.
