Parlamentario Endy Croes a analisa e Jaarverslag 2019 presenta pa Prome Minister Evelyn Wever-Croes. Promer Minister a inicia cu 75% di tur e obhetivonan ancra den programa di gobernacion bou capitulo uno. Pues di 12 obhetivo a inicia cu 9 y ta ehecutando pues 75% den apenas dos aña. Banda di esaki nos por a tuma nota cu a reduci gastonan di personal pero tambe gastonan di ‘voorlichting en promotie’ drasticamente.
Reduccion gastonan di promocion
Croes ta dedica algun tempo awe pa splica tocante e post ‘voorlichting en promotie’. Mike Eman bou di e post aki su so como Minister Presidente durante aña 2017 a (mal)gasta Afl. 1.008.600,-, esta algo mas cu 1 miyon florin na ‘voorlichting en promotie’. Basta amigonan di Mike cu awe ta grita duro na radio cu un odio inmenso den nan sistema tabata come y biba den luho di e post aki. “Speed cu Patrick, boso t’ey?” Den e Jaarverslag por a lesa con Evelyn Wever-Croes a cambia e maneho aki den su totalidad y a rebaha esaki cu 82.5%, esta di Afl. 1.008.600,- (2017) pa Afl. 176.500,- den 2019. Un besparing di Afl. 832.000,- florin!
Reduccion gastonan di huur di auto.
Segun Croes, tin hopi cifranan interesante riba, bahamento di gasto di Bureau di Prome Minister pero lo amplia riba esakinan den otro articulo. Por a tuma nota cu den huurmento (leasing) di auto bao di Eman esaki a costa Pais Aruba Afl. 58.500,- (2017) pa su Bureau y den comparacion cu Wever-Croes a constata un rebaho di 30% den gasto di lease auto, esta di Afl. 58.500,- (2017) pa Afl. 41.000,- (2019). Croes ta sinti cu e mensahe aki mester yega na henter pueblo di Aruba di e sacrificionan cu e actual gobierno ta haciendo cortando den gasto lo mas cu por pa asina logra yega na e normanan palabra cu Hulanda.
Croes ta termina bisando cu e ta spera cu sindicatonan aprecia e ehercicionan cu ta wordo haci internamente tocante bahamento di gasto momento cu nan ta na mesa di negociacion. Un palabra di felicitacion pa nos Prome Minister na e manera cu e ta manehando Bureau di Algemene Zaken.
