E nobena di Pasco di Nacemento cu ta wordo realisa durante nuebe dia consecutivo ta e preparacion spiritual pa medio di Misa di Aurora pa celebra e yegada di Niño Hesus.

Tur misa rond di nos isla ta celebra Misa di Aurora pa 5or di mainta, cu e participacion masivo di nan parokianonan. Un di nan ta Misa Birgen di Fatima na Dakota, caminda pastoor Jozef Pelc ta sigui cu e tradicion religioso aki, hereda for di e frèrenan Hulandes.

Pa casi cuater decada, Anna Yearwood Broadbelt hunto cu su coro Ann’s Choir ta parti tradicional caba di e celebracion religioso aki. Anna cu su repertorio di canticanan di misa cu un ritmo Caribense basta contagioso y alegre, ta mantene tur creyente bon lanta y cu animo.

For di aña 1983, Ann’s Choir ta participa tur aña durante misa di Aurora y tambe durante otro celebracion religioso di e calendario Liturgico. Anna ta recorda cu alegria e palabranan di su difunto esposo Sonny Yearwood, kende tambe tabata musico y kende a yega di toca pa basta aña den Caribbean Hotel y na Radisson Hotel. “Anna a bosonan ta toca pa e angelnan, ami ta toca pa e otronan…” Te ainda Anna ta puntra su mes kende ta e otronan…

Pero prome cu Anna a bin cu su coro Ann’s Choir, ya caba e tabatin su Kinder Koor for di aña 1978, caminda nan tabata participa den tur misa di Aurora y misa regular. “Koor di misa nos ta cu ta canta henter aña!,” e ta aclaria. Nan ta toca na Misa Birgen di Fatima na Dakota den dianan special, manera Dia di Mama, Dia di Tata, Pasco Grandi, etc.

Con Ann’s Choir a nace?
E ta recorda cu nan tabata un grupo di oracion te ainda. Pero un dia el a dicidi di bisa: “Bon, ban canta!” E ora ey, Anna a cuminsa busca e tocadonan, entre nan e miembronan cu tabata den e grupo di oracion, y miembronan di koornan.

Nan a cuminsa cu e sistema di banda. Nan so tabatin henter musico, entre nan difunto Lucio Rivadeneira. Ya caba a transcuri 36 aña di existencia di Ann’s Choir, nomber cu pastoor Jansen a dun’e. Ainda nan ta mantene nan miembronan original. Nan ta alrededor di 26 miembro. Entre esunnan cu a forma parti di e proyecto aki for di inicio tabata Ruben Sneek y Reno Steba, kendenan tabata toca prome for di Kinder Koor.

Algo cu ta caracterisa e koor aki ta su ritmo Caribense cu ta pone na nan canticanan di misa. Anna a bisa cu ta e mesun pastoornan ta esunnan cu tabata trece e musica p’e for di Jamaica, Trinidad y Barbados. Logicamente tambe musica produci na Aruba mes.

“Nos ta yen! Ma haya hopi musica for di difunto Rufo Odor,” el a bisa. Encuanto e ritmo y areglo Caribeño, Anna ta laga bay un sonrisa bisando: “Ta nos mes!” Pero e no ta algo cu nan a haci arbitrariamente, sino cu difunto Monseñor Ellis a manda bisa nan: “Corda nos ta Antia. Y Antia ta tumba, merengue, etc…” Y Anna no a desobedece e ordo aki. El a afirma: “Y esey nos a hinca aden!”

Anna Yearwood Broadbelt semper tin un sonrisa. Actualmente e tin 78 aña di edad y cu poder di Dios, e ta cla pa celebra su 79 aña caba entrante otro aña. Despues cu Anna hunto cu su coro por a cumpli cu Señor y cu parokia di Dakota den cuadro di Pasco di Nacemento, Anna su mensahe pa henter comunidad di Aruba, y particularmente pa e parokianonan di Misa di Birgen di Fatima na Dakota, ta: “Mi ta desea tur hende un bon Pasco y cu pa e aña binidero hendenan sigui kere den Papa Dios. Sin Papa Dios nos no por haci net nada. E ta habri caminda pa bo. E ta yuda bo y e ta cana bo dilanti y abo su tras.”