AZV (Algemene ziektekosten verzekering a tene nan evento conhuntamente cu nan dia internacional di sistema universal di cuido di salud. Nan a haya esaki di suma importancia, pa asina mustra comunidad di Aruba ‘con bunita esaki ta’.
Joost Van De Kamp, relacionista publico di AZV a comparti cu otro pais na mundo kier un sistema manera esun cu Aruba tin. Den e evento tabatin invitado di afo y tambe esunnan cu kier mira con por implementa un sistema similar pa nan pais.
Tambe AZV a mustra nan logo nobo. Van de Kamp ta splica cu e tin un nificacion y un noticia grandi cu AZV ta haci: E era nobo cu e departamento ta bayendo, manera e parti di e app, unda cu lo tin e digi zorgpas.
E zorgpas digital ta bay reemplasa e carchi di plastic pa tur hende cu tin e app. Pa esunnan cu no tin e app, nan por sigui haci uzo di e carchi, pero ora e caduca mester acerca AZV pa sign in pa e app.
E ta comparti cu esey ta e era nobo cu AZV ta bayendo despues di 20 aña. “Nos ta bay cu tempo, tin bentaha pa bin cu e carchi den e app. Caminda e tata y mucha tur dos por haya digi zorg app y no mester comparti. E ta bira mas facil.”
Tambe lo bay tin e actualisacion automatico pa persona cu tin permiso. Cada aña nan mester renoba. A base di dato di Departamento DIMAS ta actualisa e automaticamente, ‘esey ta haci cu fluho di bishita lo baha na AZV’.
A puntra Van de Kamp cua ta e vision di AZV. E ta bisa cu manera e app y logo ta mustra, e ta forma mas moderno pa acelera e proceso di servicio. Pa 2020 nan kier pueblo su horea y wowo pa comparti nan idea pa modifica e app pa e bira miho.
E cambio digital ta pa comunica directamente cu cliente. Tambe a tuma nota cu hende a haci uzo di e rating app pa dokter, e botica na warda, entre otro informacion, y a constata cu pueblo ‘tin demanda di cosnan asina’.
Segun Van de Kamp a bisa cu a haya resultado satisfactorio cu persona ta haci uzo di rating di dokter. Nan ta contento cu e servicio di parti di dokter. Nan a duna un premio pa e dokter cu a score mas halto.
Lo bin cu tambe cu e parti di educacion preventivo? E ta bisa cu ta posibel pa e era aki. Nan kier pa mas hende download e app y asina ‘set un parti di prevencion’. Tambe nan evalua e parti di website y tur cos por cambia despues.
