E aña aki e containernan yen di klapchi a drenta specialmente laat, cu consecuencia cu no por test nan di nobo. Esaki ta e di 3 aña cu esaki ta pasa, cu malcontento di e comision di klapchi cu mester controla e material pa siguridad.
Ta trata di 20 container di klapchi cu diabierna siman pasa a yega na e luga destina pa saca e material: Wela. Bou wowo di duaneronan, brandweer y DTI a controla esaki, pa asina comerciantenan por cuminsa bende klapchi awe. Tin comerciante cu ta keha cu nan no lo por bay bende klapchi si ta tarda hopi pa haci e control. Un di nan a hasta bisa cu ‘mi a yama e minister caba’.
Sinembargo e autoridad cu ta haci control ta bisa cu comerciante mes ta zorg pa e situacion, pasobra nan ta kibra e reglanan. Esaki debido na e echo cu tur klapchi mester t’ey caba di prome di december. Y cu presion grandi prome cu Pasco, e control tecnico no por tuma luga. Un trahado di DTI a bisa cu pa esey “bo mester henter un team. Esey no lo bay pasa un par di dia prome cu Pasco.”
Vocero di Brandweer, Ferdinand Ponson ta haya cu “si klapchi por drenta na tempo na Corsou, dicon na Aruba no?”
