Klapchi ta consisti di un material explosivo cu por causa explosion y candela, cu mayoria di biaha tin un fin recreativo pa comunidad, pero tambe ta trece cune molester pa animalnan, cu tin nan oido hopi sensibel.
Fundacion Nine Lives Aruba a duna di conoce cu den dianan aki, nan ta busca refugio temporal sigur pa nan pushinan, asina nan por ta den un luga leu di klapchi desde dia 30 di december te dia 2 di januari di 2020.
Pa un persona cu kier yuda cu refugio temporal pa pushi, e fundacion ta informa cu nan mes ta duna un haula chikito catlitterbox, catlitter y cuminda. E idea ta pa e pushinan por keda den un luga sigur cu hopi atencion, cariño y protegi di e zonido di klapchi.
Fundacion Nine Lives ta un fundacion cu ta dedica pa salba pushinan specialmente y cacho, nan ta duna refugio temporal ademas di busca personanan adecua pa su adopcion.
Ademas di e molester di e zonido, tambe e bestianan por presenta stress y miedo, accion di panico ta aumenta pa via di explosionnan fuerte. Cachonan tin e posibilidad di scucha te 25 meter leu of mas, loke ta causa cu klapchi ta algo dañino pa nan.
Aruba tin hopi cacho riba caya, cu ora di klapchi, nan ta purba di core y sconde den cualkier caminda. Tambe nan por presenta problemanan cu curason, cu ta indica riba un situacion di malestar profundo.
Aunke pushinan no ta sinti e efectonan igual cu un cacho, tambe nan ta purba di sconde of scapa. Ademas, nan tin riesgo mayor di intoxicacion pa e causa aki, ya cu su curiosidad ta haci cu hopi pushi ta cerca di e luga ora e klapchi ta explota y nan ta consumi e resto di polvora cu ta keda.
Pa e motibo aki, hende cu ta gusta celebra temporada di fin di aña cu klapchi mester tene cuenta animalnan, cu por keda afecta pa esaki. Si algun persona kier ofrece ayudo pa e pushinan den dianan aki por tuma contacto cu Geraldine Toro Vera Kock na number 561-9187.
