Despues di mas di un luna cu a habri e Watty Vos Boulevard, DOW a duna un splicacion riba e uzo di e boulevard y rotonde mirando cu tabatin keho riba trafico y tambe con comunidad ta haci uzo di dje.

Director di DOW Marlon Croes a duna di conoce cu a haci un evaluacion di e trafico y por bisa cu e ta canando bon. Sinembargo despues di 5 di november cu Watty Vos Boulevard a keda disponibel pa publico, ta keda cu den e prome simannan tin periodo di ‘aclimatisacion cu ta varia entre 4 pa 6 siman’.

Den e periodo aki ta investiga y midi con e trafico ta bayendo. Mirando cu ora pone un caminda disponibel tur hende kier pasa of wak e caminda pero cu tempo hende lo scoge nan ruta nobo.

Croes ta comparti cu ta lamentabel cu den e 4 pa 6 siman a cay net den e periodo di temporada halto. Den e ‘peak di fin di aña’ anto esey ta pone cu no ta periodo representativo pa por haci un midimento.

Aunke nan sa esey, Croes ta bisa cu nan tin nan hende y ‘ami mes’ ta core e ruta pa wak unda e problema ta encera. “Nos a constata cu e prome siman e rotonde di Tanki Leendert y Ponton tabata pega fuerte.”

Esun cu menos intensidad tabata esun di Seroe Patrishi. Den e proceso nan a wak cu Tanki Leendert a alivia y e rij di trafico ta bira menos. Pero unda ta keda duro ta e esun di Ponton cu nan lo bay evalua.

Croes: Automobilista cu no sa subi rotonde ta pega trafico.
Sinembargo Croes ta comparti cu tin automobilista cu no ta core e rotonde manera mester ta. Esey por ta un punto, mirando cu tin auto ta duna indicacion cu lo baha e rotonde anto esun cu tin cu subi ta djis keda wak na banda y warda e rotonde ta full bashi pa nan subi.

Esey segun Croes ta pone cu ta perde hopi capacidad den e proceso. Un otro punto cu nan tambe a ripara ta e cu por contribui na un fila largo na area di Ponton te cu Tanki Flip pa yega Fermin’s Bar ta e cantidad di casnan cu tabatin y awo a converti den actividad comercial.

“Ora cu tin actividad comercial e trafico ta bira mas intenso pasobra nan ta uza e banda di caminda pa parkeer nan auto. Ta wak por ehempel ora cu nan ta baha rotonde pa direccion Noord, nan ta para bira man robes di biaha pa bay un establecimento anto eynan e ta pega atrobe pa un 6 minuut despues ta flow bek”, Croes ta splica.

Nan ta evalua con nan ta bay haci pa e cambio chikito na rotonde y kico por haci na Ponton y Tanki Flip pa aumenta e capacidad di stretch e caminda pa stipula e fluho di trafico.

‘Ta bon cu automobilista ta keda consciente pa laga hende crusa na rotonde.’
Sinembargo nan por bisa cu ta haciendo bon uzo di e boulevard aki. E ta agrega cu tin su punto nan debil y mester mehora pero general ta contento cu por wak cu hende ta yega na crusa e caminda despues di e rotonde y auto ta para pa duna chens pa hende crusa.

DOW ta satisfecho cu tur cos den su totalidad y e resultado cu ta dunando. E tin su punto di mehoracion cu lo traha pa proximo aña.