Contribucion di sector colectivo ta hancra den protocol; CAft su conseho ta cla y positivo pa presupuesto 2020

E echo cu 5 aña pasa Aruba tabatin un deficit di 444 miyon florin den su presupuesto y cu awor durante tratamento di e presupuesto complementario diabierna ultimo, presupuesto 2019 ta cera cu un deficit di 4 miyon florin, ta un logro di gobierno cu fraccion di MEP ta elogia. Tanto lider di fraccion aki cu ta sostene gobierno, Rocco Tjon como su coleganan, Endy Croes y Edgar Vrolijk a referi na dje.

Parlamentario Tjon a bisa cu e ‘algo grandi’ cu por reduci substancialmente e deficit di presupuesto di Pais Aruba. E ta haya cu esaki ta prueba cu ‘gabinete Wever-Croes ta maneha di un forma responsabel finansa publico’ y cu nan ta fiha nan prioridad di forma corecto. Tambe el a laga sa cu e colegio di supervision financiero (CAft) ya caba a emiti nan conseho -aunke ainda nan no a ricib’e ainda y nan ta compronde cu esaki ta uno positivo y cu gobierno lo por yega na e surplus di 25 miyon florin den nan presupuesto 2020.

Sector colectivo.
Sinembargo pa logra cera e deficit for di 24.8 miyon florin te 4 miyon florin, gobierno a conta cu e contribucion di e sector colectivo of empresanan estatal. Riba e punto aki y contestando pregunta di Bon Dia Aruba, Parlamentario Tjon a referi na e echo cu gobierno a haci uzo di dividendo di compania estatal pa cera cierto buraco den presupuesto 2019.

Nan a bisa cu esaki ta algo cu ta wordo haci for di 2015. “Pero semper aworaki manera e palabracion ta haci, sector colectivo tambe, mester forma parti di dje,” el a bisa. Nan a bisa cu esaki ta hancra den e protocol, caminda cada dos aña e por varia. Segun data di CBS nan ta nombra cual ta e companianan estatal cu por contribui cu nan dividendo pa alivia e gasto di presupuesto di pais Aruba. El a agrega cu te hasta si bo ta laga e contribucion di e sector colectivo afo, mes gobierno a yega di cumpli cu e normanan caba.

Segun e parlamentario, esaki ta un palabracion cu a wordo haci for di hopi aña caba. Y den e protocol tambe ta para cu mester inclui e sector colectivo pa asina por yega na un suma total.

Reaccion.
El a reacciona riba e critica cu ta bin for di oposicion cu e fraccionnan cu ta sostene gobierno no a haci niun pregunta rond di presupuesto complementario.

Riba e punto aki, Tjon a argumenta cu apenas algun siman atras, minister di Finansa y Economia, Xiomara Ruiz-Maduro a duna un presentacion riba e nota di fin di aña 2019. Den dje e mandatario a elabora specificamente riba e desaroyo economico, entradanan y gastonan di gobierno. Pero tambe riba nos debe nacional y e proyeccion for di 2019 pa 2020.

E ta conclui cu gobierno a cumpli cu e normanan di supervision financiero manera a keda acorda den e protocol firma cu Hulanda. E echo cu nan a ricibi e presupuesto complementario cu e conseho di CAft hunto cu e conseho di Raad van Advies (RvA) cu a yega na e mesun conclusion, cu gobierno a cumpli financieramente.

E ta haya cu esaki tabata un motibo tambe pa kico no tabatin pregunta di parti di nan fraccion por escrito, pasobra ‘e no lo ta di balor agrega,’ parlamentario Rocco a bisa.