Recientemente a sali den publicidad cu e fondonan riba presupuesto di gobierno, destina pa cubri e deficit di Serlimar, no tabata suficiente y cu un extra Afl. 800.000 mester a añadi na e suma di Afl. 5,1 miyon reserva pa esaki caba.
E fraccionnan di coalicion a bay di acuerdo cu un cambio di ultimo ora di e presupuesto complementario 2019, pa incorpora e gasto extra aki, pa cual segun e mandatario tabatin suficiente recurso di su ministerio pa cubri e extra gasto aki. Segun nos a comprende e extra placa aki tabata pa paga salario, loke semper ta algo di prioridad. Naturalmente lo mester bin un splicacion pakico e 5,1 miyon presupuesta no a yega pa cubri tur gasto di operacion di e compania. Tambe lo ta importante pa sa si e compania ta cumpliendo cu su deber di duna cuenta financieramente. En todo caso, a primera vista no tin motibo pa duda si e gastonan extra ta hustifica.
Sin embargo, mientras tanto a cay den nos letterbox digital algun copia di documento di e compania, cu ta duna un resumen di e gastonan di mercadeo di Serlimar. Nos no sa si e documento ta refleha tur gasto haci cu promocion den medio di comunicacion. Di tur manera, nos por saca e conclusion cu e gastonan total mensual ta yega na algo mas di Afl. 21.000, cu ta acumula na gasto anual di e resumen aki di poco mas di Afl. 250.000.
Nota di redaccion:
E pregunta cu ta surgi ta si un mercadeo asina pisa ta necesario den caso di un empresa estatal. E compania, asina leu cu nos por observa, tin un mercado stabiel y grandi den sector di sushi di cas. Mester bisa tambe cu e servicio a mehora bastante, segun nos impresion, aunke no tur hende necesariamente ta di acuerdo cu esey. Di tur manera, mas mercadeo no ta mehora servicio, esey ta e compania mes ta hacie den su operacion diario. Lo ta recomendable pa usa e recursonan aki pa miho operacion anto. Pregunta: no ta esaki ta e cosnan pa cual a critica e gobierno anterior?
