E ultimo incidente cu a sosode recientemente den hospital tin di haci cu e atake cibernetico. Parlamentario Endy Croes no ta compronde cu tin alrededor di 11 IT na servicio di hospital y ‘toch cos asina ta pasa’.
Ademas no tabatin backup, locual a haci cu prome minister a declara of activa un plan di calamidad. Den e caso aki, Parlamento ta haya sa cu hospital ta pidi extra entre 4 pa 5 miyon florin. “Di un anochi pa mainta sin un splicacion!,” segun e parlamentario di e fraccion di MEP.
E ta sinti cu esunnan cu ta na cabes di Horacio Oduber Hospital (HOH), cu ta e Hunta di Supervision y tambe e Hunta Directiva cu aworaki tin un miembro cu ta e Director di HOH, Cilié, mester entrega nan posicion. “Ta yega momento pa bo honra bo mes den e caso aki.”
Croes a declara na Bon Dia Aruba cu hospital, for di algun aña pasa, ora cu nan a cuminsa cu e trabou di renobacion y expansion, ta pasando den varios problema. E aña aki un yobida a ocasiona cu masha hopi awa a drenta den diferente parti di hospital, causando hopi daño.
Como Parlamento, nan a cuestiona e echo aki. Te hasta nan a yama e hunta di supervision, tambe e director Cilié, pero tambe representante di SOGA y di AIB Bank cu ta e instancia cu ta financia e proyecto aki. A pesar cu nan a haya contesta na un cantidad di pregunta, nan no a keda convenci di nan, Croes a bisa. Actualmente AZV ta aporta pa cuido na hospital casi 200 miyon florin pa aña. E directiva mester maneha e suma aki, pero pueblo no ta hayando e resultado cu nan kier mira, segun Croes.
