Diaranson ultimo departamento di Gele Koorts en Muskieten Bestrijding a ricibi dos mashin nobo pa combati sangura. Esaki ta un inversion di mas of menos 45 mil florin cu Minister di Salubridad Publico a haci pa por sigui combati y preveni malesanan transmiti door di sangura.
E mashinnan ta di marca Igeba cu ta produci na Alemania y a wordo entrega door di nan agencia na Aruba cu ta DAL Pest Control. Ta trata aki di dos aparato di cual e prome mashin ta un ULV (Ultra Low Volume) Aerosol Generator. E mashin aki ta uza volumen halto di aire na un presion abou pa transforma pesticida likido den drupelsnan cu por wordo distribui den e atmosfera. E di dos mashin ta un Thermal Fogger cual por produci gran cantidad di huma di pesticida cu ta wordo uza pa fumigacion.
Ambos aparato lo wordo uza ora tin hopi molester di sangura den bario nan of ora tin alerta di outbreak di malesanan transmiti door di sangura manera por ehempel Dengue, Zika y Chikungunya. Ambos mashin por wordo uza tambe pa combati e sangura preto cu ta sangura di mangel, comun den e area di Savaneta y Pos Chikito.
Cu yegada di e dos mashinnan aki e personal di GKMB ta hopi contento pasobra nan por sigui eherce nan trabou, solamente awo den tempo mas cortico y nan ta bon ekipa y prepara pa cualkier eventualidad riba e tereno di combati sangura.
