Siman pasa a tuma luga un movemento mundial ‘Hour of Code’, caminda rond di mundo, hobennan ta haya oportunidad pa explora con ta desaroya un programa a traves di weganan di computer.
Docente di informatiekunde, Judith Koolman, di SPO (Scol pa Ofishi) a comparti cu hopi biaha hoben no ta haya oportunidad pa haci cosnan mas leu riba computer, y cu esey ta importante pa motibo cu rond mundo ta desaroyando cu tecnologia. Awendia, ‘tur cos ta via tecnologia’.
For di dialuna siman pasa a cuminsa cu e proyecto pa henter siman cu henter e scol. Koolman a bisa cu e reaccion di studiante tabata uno positivo, mirando cu nan tabata sa caba cu lo tin algo diferente lo tuma luga. “Nan ta bin cu mas animo cu normal” pasobra nan sa cu lo tin algo extra.
E ‘Hour of Code’ ta e cuminsamento di coding, caminda e muchanan por siña via di un wega con ta desaroya nan habilidad. Asina por mira si nan ta interesa pa studia den futuro pa bira un programado. Koolman ta duna di conoce cu ta splica studiante cu app cu ta existi riba celular, ta un persona a studia pa esey, pa desaroya un programa.
Pa e muchanan di prome aña tabata algo nobo. Mayoria no sa kico ta programado y kico e trabou ta encera. Nan tin app den nan telefon, pero no tin idea cu tin un persona su tras cu a traha riba dje.
Pa esunnan den tercer aña a scoge wega mas dificil, pa motibo cu nan tin idea caba kico e ta.
Koolman ta expresa cu ora nan ta haya sa esey, nan ta keda sorprendi y esey por motiva nan pa sigui practica.
“E studiantenan ta expresa cu ta algo diferente, algo cu normal nan no ta haci. Nan ta wak wega cu nan ta hunga na cas, pero cu nunca nan conoce e banda di coding. Awo nan ta haya chens pa en berdad experiencia con por traha un wega. Tin di nan cu ta bisa cu na cas ta hunga pa try out, pa wak con nan por desaroya nan mesun wega. Tin apps cu por uza pa haci nan mesun wega pa wak con leu bo kier yega”, Koolman a expresa.
Di e forma aki tambe ta motiva pa duna nan un idea pa traha den area aki den futuro. Koolman ta splica cu nan di SPO, e muchanan ta riba nivel di beroepsonderwijs, pero despues nan por sigui studia EPB, EPI. Nan por sigui bay dilanti cu nan estudio.
Segun Koolman, tin hopi di e muchanan cu tin habilidad tecnico ora nan ta mucha, cu por profundisa nan mes den computer. Por ta no bira un programado, pero un tecnico di drecha computer, traha den IT of por bisa un mecanico, cu mester sa di tecnologia pasobra tur auto ta moderno y ta traha cu cosnan computarisa. “Nos bida diario ta domina pa tecnologia.”
Esaki ta SPO su di 5 aña ta organisando Hour of Code. Nan ta inscribi nan mes na e website www.hourofcode.com. Segun Koolman, e plan ta pa sigui module unda cu nan por haci wega mas avansa y bay den linea di coding y pa por haya programa avansa pa traha.
