Gobierno na e momentonan aki, no a entrega presupuesto 2020 ainda na Parlamento caminda nan ta casi cuater luna laat cu esaki y mientras cu Parlamento di Aruba mes no ta na altura ki tempo esaki lo tuma luga, por bisa cu Hulanda ta mas na altura di e proceso aki cu Parlamento di Aruba.

Michael Lampe di fraccion di AVP ta mustra cu fuera di no por a cumpli cu e ley di comptabilidad door di entrega presupuesto pa dia prome di September, ni sikiera e presupuesto supletorio 2019 ainda no a yega Parlamento.

“Ora cu gobierno di Reino bisa cu ya nan no ta kere ni confia den e maneho financiero di Prome Minister Evelyn Wever Croes y Minister di Finansa Xiomara Ruiz Maduro, nos por compronde esaki totalmente.

Sigur ora cu nos mira cu gabinete Wever Croes no por ni cumpli ni cu su mes, ni cu ley y reglanan di pais Aruba, corda pa cumpli cu loke nan a priminti gobierno di Den Haag, algo cu a bira e forma di procede di e gabinete actual.

Aruba tin un gobierno cu for di prome dia den gobernacion a faya barbaramente cu pueblo di Aruba, ya cu ningun promesa y siguransa cu a duna pueblo cu nan a haci, a wordo cumpli.

Un gobierno cu tin e curashi y poder di gaña henter un pueblo, simplemente ta un gobierno cu no por goberna cu e berdad, cu no por goberna cu consenshi limpi y ta sigui faya cu pueblo y hasta faya cu tanto gobierno di Reino y cu e comision di supervision CFT.

Practicamente nos ta drentando ultimo siman prome cu Parlamento baha cu reces diabierna venidero y ainda no tin indicacion cu nos lo trata presupuesto supletorio 2019 of otro leynan cu gobierno tin cu pasa ainda cual leynan tin influencia riba e maneho financiero pa 2020.

No solamente e aspecto ey pero Prome Minister a priminti Conseho di Minister di Reino durante su bishita urgente na Den Haag recientemente, cu e lo pasa cierto leynan cu mester habri caminda pa su gobierno cumpli exigencianan cu Hulanda pa pone pa su gobierno.

Memey di tur e caos financiero aki causa pa un maneho sin pia ni cabes di gabinete Wever Croes, ta surgi algun miembro di Parlamento cu ta bay prensa pa atende cu un rapport di Algemene Rekenkamer di casi cuater aña pasa pa hunga nan weganan politico, purbando di dirigi interes di pueblo riba un asunto cu no tin nada di haber cu maneho di nan gobierno actualmente.

Observacion haci pa ARA cu ta cuestiona cierto decisionnan haci pa un minister di gobierno di AVP, mustrando un desesperacion sin igual pa trata di sconde of tapa mal maneho di nan gobierno cu nan ta sostene.

Si e parlamentarionan di MEP aki ta haci nan trabou manera mester ta, nan lo por a bay mira e ‘jaarrekening’ di mesun aña cu ARA ta menciona den cual gobierno a hustifica y splica e cambio aki manera mester ta.

Sinembargo ora cu ta papia di ‘jaarrekening’ pueblo tin cu compronde aki cu e miembronan di fraccion di MEP ainda no a cera conoci cu un ‘jaarrekening’ di nan gobierno, ya cu for di 2016 ora cu nan mes a dicidi di no aproba e jaarrekening 2016, nan a crea un situacion delicado pa nan propio Minister di Finansa y te cu dia di awe gabinete Wever Croes no a haci nada cu e jaarrekening di 201 y tampoco a traha riba e jaarrekening di 2017 y 2018.

Na luga di bay atende cu nan gobierno riba e puntonan aki, nan ta busca argumentonan politico sin sentido, tratando na crea algo pa cambia atencion di pueblo pa e maneho horibel cu nan gobierno ta hibando.

Un gobierno cu a castiga pueblo cu medida y cu lo sigui castiga pueblo cu mas medida rumbo pa 2020 caminda e poder di compra di nos pueblo, lo sigui disminui y pobresa lo sigui bati na porta di hopi cas di famianan rond Aruba,” Parlamentario Michael Lampe a declara.