Presidente di Aruba Timeshare Association, Luigi Heredia tambe a forma parti di e cinco gremio di e sector priva cu hunto cu Atia, Ahata, KvK y Aruba Food & Beverage Association a vocifera nan preocupacion riba e maneho cu gobierno ta hibando riba tereno fiscal.
“Nos ta akinan pasobra nos ta preocupa cu e forma di implementacion di e reforma fiscal,” el a bisa. Heredia a agrega cu e preocupacion mas grandi ta cu tur cos lo bin na ultimo ora. “Pa nos esaki no ta good government.”
El a bisa cu den e sector di timeshare nan ta traha y manda nan presupuesto mas cu 6 pa 9 luna adelanta. Ya pa aña 2020 tur nan miembresia tin nan quota di mantenemento cu mester paga. E introduccion di un impuesto di ultimo ora ta afecta nan sector substancialmente.
Algo similar a sosode na inicio di e aña aki Heredia a bisa ya cu e gobierno a subi e grondbelasting 50%. El a referi cu na Costa Linda Resort, unda e ta traha, 50% di aumento di grondbelasting ta nifica 170 mil florin cu ta aumenta di golpi pa un aña.
Igualmente el a vocifera cu nan preocupacion tambe ta e costo pa haci negoshi. Heredia a splica cu e negoshi di timeshare na Aruba ta existi pa mas cu 40 aña. Nan sa cu e miembresia di e tempo comparti of timeshare ta miembresia fiho. Durante e ultimo dos bahada cu Aruba su turismo a yega di pasa den dje, semper e miembresia di timeshare a sostene nos isla su economia. Ya cu nan miembresia semper ta bin Aruba fielmente. “Semper nan ta sostene e isla,” el a bisa.
Sinembargo Aruba Timeshare Association por a ripara cu hopi di nan miembresia cu ta biniendo pa mas cu cuater decada na Aruba, ta sintiendo cu “ya no mas!” E motibo principal ta cu Aruba ta birando hopi caro pa nan.
