Gobierno di Surinam ta desea di sigura exportacion di aros pa 2020 y Cuba ta figura como un di e posibel partnernan comercial, segun prensa di e pais Suramericano.
Desde algun tempo varios publicacion ta referi na e intencion di Surinam di haya mercado nobo pa nan produccion, pa cual e ministro di agricultura, ganaderia y pesca, Rabin Parmessar, a biaha pa Cuba cu e meta di establece acuerdo pa yega na e proposito ey.
“Mundo ta clamando pa fruta y berdura cultiva di manera sigur y, si nos por traha riba esey, nos por conkista e mercado ey y garantisa nos hendenan y e mercadonan di exportacion alimento sigur y di calidad halto,” e ministerio di agricultura di Surinam a bisa den un comunicado di prensa.
Autoridadnan di Surinam ta añadi cu otro paisnan di e region manera Barbados a mustra interes mientras tambe ta mantene combersacion cu Canada, Guadeloupe y Martinique.
Surinam, un di e destinonan anteriormente mas considera pa Cubano cu ta emigra, ta conserva bon relacion cu e regimen di Miguel Diaz-Canel. Algun dia pasa presidente Desi Bouterse a cancela un bishita na Cuba, despues di keda condena na 20 aña di prizon, declara culpabel di morto di 15 opositor politico na 1982.
Di otro banda e isla ta pasando den momentonan di un crisis energetico y di abastecemento di varios producto. Esaki ta bay combina cu e mal calidad di e alimento cu estado ta provee, cu ta motibo di hopi critica na e isla.
Cuba tin un demanda nacional di aros di 700.000 ton anual, pero e pais apenas ta produci 40% di su necesidad actual. Den pasado e produccion di aros tabata yega na 304.000 ton. E pais awor tin un programa andando cu mester garantisa produccion di 85% di e necesidad anual prome cu 2030.
