Temporada di Pasco ta un temporada di reflexion, un celebracion cu ta nifica union entre famia sin importa e creencia religioso, como tambe ta nifica e dianan di duna regalo pa e personanan y muchanan cu no tin suficiente recurso.

Diasabra pasa na Cas di Cultura, e grupo hopi reconoci riba Facebook cu ta yama MiMami a organisa un Christmas Toy Drive cu e obhetivo di recauda co’i hunga pa duna na muchanan den temporada di Pasco aki.

Rachel Murray, creado di e grupo cu aworaki ta conta cu mas di 6.500 siguido riba e red social, a splica cu esaki ta trata di e di dos Christmas Toy Drive. Un iniciativa cu ser a lansa door di e pagina mes, cual ta un grupo di sosten pa mamanan den comunidad y aki nan ta duna e apoyo cu e mamanan mester pa ehecuta nan tarea maternal.

Tocante e evento, el a menciona cu esaki tabata algo hopi exitoso, unda comunidad di Aruba a bin aporta, ofrece nan apoyo y duna e gesto bunita di nan co’i di hunga cu kisas e muchanan no ta uza mas. Asina tambe tabatin algun cu a saca un tiki di nan tempo pa bay cumpra regalo y trece na Cas di Cultura, pa asina por haci un mucha feliz den e temporada di Pasco aki.

Di mesun manera, Murray a informa cu dia 18 di december proximo, nan ta bay envolve e cantidad di aproximadamente mas di mil co’i di hunga cu nan a recauda diasabra ultimo. Esaki lo tuma luga na Cas di Cultura tambe y nan ta bay habri e portanan pa hende cu lo kier colabora cu esaki por yuda nan den e accion aki.

Murray a comenta cu aña pasa esaki tambe tabata un exito. Nan a acumula e cifra di 700 co’i hunga, pero e tempo ey nan tabata cuminsa cu e grupo y no a haya e mesun recepcion cu e aña aki, cu tabatin e sosten di Subway y nan a surpasa e expectativanan, segun Murray mes a manifesta.

Tambe Murray a laga sa cu dia 21 di december proximo, nan lo bay haci entrega tur loke nan a recoge. El a duna danki pa e cooperacion y ayudo di Subway, cu nan a ofrece un truck pa haci e entrega specialmente pa muchanan cu menos recurso.

Igualmente el a menciona cu Post Aruba tambe a duna e sosten pa nan por yega na e famianan cu menos recurso y asina nan ta core den barionan. Manera el a biba den su experiencia aña pasa, ‘ta existi famianan y muchanan cu tin necesidad, cu no tin co’i pa hunga, sino cu nan lo haci cu par di piedra’, Murray a comenta.

Murray a gradici tur hende cu a acerca Cas di Cultura cu a sali y coopera cu un gesto bunita, como tambe muchanan mes cu a hiba nan mesun co’i hunga cu nan no ta uza mas y entrega cu un sonrisa riba nan cara.

Mayornan cu tambe a splica muchanan loke nan a haci tambe tabata un parti importante, pa motibo cu nan a papia cu nan yiu pa nan por sa kico nan a haci y asina nan por colabora pa haci otro muchanan feliz.

Asina mes, Murray a expresa cu esaki tabata un orguyo, pa motibo cu tin hende den comunidad cu ta dispuesto pa yuda un otro y esey ta e meta di grupo, sostene e otro den tur fase di e tarea di mamanan.

Tocante otro aña, el a expresa cu e grupo MiMami tin hopi cos y evento prepara, como charlanan educativo, evento di Zumba. El a haci un yamada pa tur e mamanan pa keda pendiente di loke nan tin plania pa haci.