Presidente di Camara di Comercio (KvK) a duna di conoce tocante e situacion den Caya Grandi pa locual ta trata parkeo. Tambe a comenta riba algun desaroyo cu lo tuma luga pa comerciante den Caya Grandi ta mas uni.
Presidente di Camara di Comercio, Kawish Misier a splica cu nan ta consciente di desaroyo y cambio cu ta tumando luga den Caya Grandi y e centro di ciudad. E ta bisa cu e problema di parkeo ta algo serio y grandi, mirando cu cada aña ta haya mas auto.
Misier ta agrega cu mas auto tin, mas necesidad pa parkeer. Sinembargo no ta mira cu mas luga pa parkeer ta biniendo acerca. Sino cu a nota cu a bin cu regla pa pleki blanco, geel y takelwagen, pero no a bin cambio pa e parkeo.
“No a soluciona e problema y e ta bira pio den cierto manera, cu esunnan cu ta cliente di Caya no por parkeer pa motibo cu e ta pa esunnan cu tin permiso. Tambe nan a tende cu esunnan cu tin permiso no necesariamente ta biba of traha den Caya Grandi”, Misier ta bisa.
E ta bisa cu por ta cu nan ta traha otro caminda, pero a obtene un permiso y no tur cu tin e permiso ta haci uzo di e parkeo. Esey ta pone cu cliente y turista ta mira un pleki habri, pero no mag haci uzo di dje.
Misier ta enfatisa cu mester bin cambio pa un mehoracion pa e situacion. Pa nan como comerciante tambe por haya alivio. “Pa aña largo Caya Grandi tabata habri, cu mester a drecha riolering, klinkers, mata nobo… pero nunca tabatin compensacion.”
Segun Misier, na otro pais manera Hulanda, ora ta habri un stupi dilanti un tienda e comerciante ta haya un compensacion. E ta expresa cu pa aña largo comerciante a sufri. Despues cu e situacion cu Aruparking, nan a mira cu diferente tienda a muda, algun a bay Tanki Leendert, Ponton y Noord, pero ‘esey no ta drecha e situacion’.
Un situacion dificil, segun Misier y na mesun momento Camara di Comercio ta consciente cu proyecto di APA, cu lo bin cu mas condominio, dos hotel, retails y mall. E ta bisa cu ta compronde cu ta bin cu proyecto, pero como consecuencia ta perhudica Caya Grandi mas ainda.
E cifra cu gobierno a analisa den ROPV tin cu dicta cua negoshi tin permiso y na cua luga. Tin diferente luga cu hopi negoshi mag bin, pero nan no a mira cu a stimula den Playa pa locual ta retail.
“Manera mi a menciona, lo tin desaroyo ta bay tin Port City, Sasaki, San Nicolas y Noord, pero nada specifico pa locual ta Caya Grandi. Locual si nos a wak cu lo bin cu hotel moratorium den centro, pero atrobe mas hotel cu ta crea, ta demanda mas parkeer y tanten no construi esey no ta soluciona e problema cu tin”, Misier a splica.
Pa locual ta trata 2020, e ta bisa cu por ta e situacion den Caya ta keda penoso. E ta bisa cu tin un bon Caya Betico Croes, anto pa e motibo aki tin cu evita otro mall. Un Port City desaroya lo competi directamente cu centro.
Tambe el a bisa cu comerciante di Caya Grandi tin cu ta mas uni cu otro, expresando cu na final di dia, ta e comerciante ta esun cu ta worry cu Playa, ta esun afecta directamente. Camara di Comercio ta afecta indirectamente tambe, ya cu ‘manera un negoshi cera, KVK tin menos entrada’.
Ta keda na comerciante di Playa pa ta mas activo pa representa. “Si nos haci’e, e comerciante di otro luga manera Noord, Ponton lo puntra dicon ta yuda esunnan di Playa y no nan. Pa a e motibo aki no por haci mas di locual ta haciendo.”
Di otro banda, Misier ta bisa cu tin algun plan cu ta encera e tereno di caya grandi no lo ta publico mas. Actualmente tin adicto ambulante den Caya of den edificio cu polis no tin autoridad pa saca, pasobra ta tereno publico. Sinembargo, esey por haci cu si e ta un tereno priva lo tin mas siguridad pa bin cu mas luz, diferente orario y siguridad, ‘esey ta algo cu lo bin’.
Misier ta bisa cu tambe a bin cu sugerencia, un di nan ta e solar roof. Esey ta percura cu tin mas sombra y ta bisa mas confortabel pa haci compras den caya grandi. Na mesun momento esey lo baha costo di electricidad pa comerciante. Den anochi nan por tin luz LED pa famia por cana anochi sin cu e ta peligroso.
