Presidente di KvK, Kawish Misier: ‘Nos comerciante no por sobrevivi mas…’

Presidente di Camara di Comercio (KvK), Kawish Misier a expresa e preocupacion cu ta existi den e gremio aki riba un posibel ‘fastball’ cu ta consisti di un pakete di impuesto cu gobierno kier bin cune entrante 2020.

Te ainda nan no a tene un reunion cu gobierno of esunnan encarga pa delibera riba nan plan di reforma fiscal proximo. “Loke nos ta wak ta cu esaki no ta un reforma. E ta aumento di impuesto, y ta mas impuesto cu ta bin acerca,” el a bisa.

Presidente di KvK su opinion ta cu si lo bin un reforma di berdad, tur partner lo ta contento, ya cu nan no ta contra di reforma fiscal. Pero si nan ta pidi pa e proceso aki por bay di un manera transparente y husto. Igualmente pa mantene un bon comunicacion pa asina delibera riba e fase 3 y/of otro fasenan di e reforma aki.

E gremio comercial no tin claridad kico lo bay pasa cu e siguiente fasenan di e reforma fiscal, ya cu e contesta cu KvK ta haya for di gobierno ta cu nan no sa. Nan ta mira cu awor nos ta den december y ainda no tin claridad. Pues nan ta wak cu e proceso aki no ta uno democratico y –segun presidente di KvK– nan kier evita cu gobierno ta pasa nan un ‘fastball’ atrobe.

“Nos comerciante no por sobrevivi mas. Negoshinan ta cerando y tin hopi incertidumbre…” el a bisa.

Ya caba un aña pasa a wordo trata un ley den Parlamento cu a wordo aproba fin di e luna di december den dianan di fiesta, pa drenta na vigor 1 di januari 2019. P’esey KvK ta preveni cu gobierno lo bini un biaha mas cu un ‘fastball’ di pakete fiscal of impuesto.

E tabatin di haci cu un reforma fiscal di diferente ley cu KvK ta considera cu ta perhudica e gremio comercial, entre nan, cu gobierno tabata kier pa BBO no ta aparece riba e factura di pago. “Nos a trece dilanti cu esaki ta decisionnan cu no ta na fabor ni di e comerciantenan, ni di gobierno, ni di pueblo di Aruba,” el a declara.

E aña aki durante e ultimo 5 luna, KvK a manda mensahe pidiendo diferente reunion cu gobierno y muy specialmente cu minister di Finanzas y Economia, pero KvK ta lamenta cu no tabatin comunicacion cu nan. Te fin di mei ultimo, un luna prome cu e fase dos di e reforma fiscal lo mester drenta na vigor, caminda publicamente den media nan a vocifera e posicion di e comerciantenan, finalmente KvK por a sinta cu gobierno.

E tempo aya, KvK a expresa cu nan ta sinti cu gobierno ta bin hibando un maneho dictatorial. E ora ey gobierno a dicidi di reuni cu nan caminda a wordo resalta cu esaki tabata e manera mas democratico pa intercambia di ideanan. Nan a reuni dos biaha, un cu minister presidente y otro cu minister di Finanzas, unda nan a ‘priminti diferente cos, pero ta promesa so nan a haci’, Misier a bisa.

Presidente di KvK a bisa cu e biaha ey e tabata un reunion cortico, unda practicamente nan a wordo condiciona pa kies tres escenario relaciona cu e ley di Sugar Tax. Tur e partner di comercio presente tabata contra di esaki, y nan a pidi gobierno pa presenta un plan integral di varios aña cu nan respectivo fasenan pa asina bin cu un discusion.

Pero te dia di awe den pleno dianan di fiesta di december, e gremio comercial no por a scucha, y tampoco nan no a wak niun plan di e reforma fiscal. “Solamente nos a scucha rumornan, pero tur lo afecta nos comerciantenan y tambe pueblo di Aruba,” el a bisa.