Willemstad – Acreedornan a pasa pa ehecuta un inusual subasta di crudo Venezolano ordena pa corte na Corsou, unda e compania petrolero nacional di Venezuela, Pdvsa, generalmente ta logra resolve e reclamonan relaciona cu su debenan.
Den e caso aki, no por a yega na un acuerdo cu e acreedornan, y e subasta a tuma lugar diaranson 11 di december na bufete di abogado Ox & Wolf na Willemstad.
E caso a ser entabla pa cuatro compania maritimo di Corsou, y despues otro companianan Griego y Britanico a uni na e caso, segun un abogado di e demandantenan a bisa Argus.
E crudo a keda bendi pa 12 miyon florin Antiyano, alrededor di US$ 6,7 miyon, loke ta ekivalente na US$ 33 pa bari, loke ta bastante bao di e valor di mercado. E petroleo subasta tabata inclui 199.882 bari di crudo Venezolano Santa Barbara, di 42° API y 3.420 bari di crudo pisa Tia Juana Heavy 11,2° API , segun e aviso legal di e subasta.
E crudo ta almacena actualmente na terminal di Bullenbaai, despues cu tribunal local a ordena su descarga di e tankero Aframax Icaro , cu bandera di Panama , un di e barconan petrolero cu recientemente a keda agrega na un creciente lista di sancion di Merca dirigi contra gobierno Venezolano. Argus no a logra confirma identidad di e cumprador. Refineria Isla, filial di Pdvsa na Corsou, a opta pa no haci comentario tocante e subasta.
