Ayera durante un conferencia extraordinario, minister presidente Evelyn Wever-Croes a anuncia un rebaho riba tarifa di coriente entrante 2020.
Hunto cu henter gabinete, e mandatario a laga sa cu tanto e sector residencial como esun comercial lo beneficia di e rebaho aki. E tarifa pa cas lo haya un rebaho entre 9.9 y 10.4% y esun comercial di 7%. Pa misa, scolnan y fundacionnan lo conoce un reduccion di 9%. E prome recibo cu e clientenan lo bay ripara e rebaho aki lo ta e recibo di maart 2020. El a bisa cu e rebaho riba e tarifa di coriente pa e sector comercial lo tin su influencia pa baha e indice di inflacion tambe.
Sinembargo, den e conferencia di prensa tabata presente director di Utilities, Richard Eman hunto cu e staf di gerencia di Elmar y WEB. Eman a bisa cu e prijs di e combustibel lo por a conoce mas rebaho si e companianan estatal no mester transferi parti di su dividend pa cumpli cu gap financiero di presupuesto 2019. “Si nos mester a paga menos dividend, por ta nos por a baha mas pa pueblo…” Pero den e caso aki nan a dicidi di cumpli cu e peticion di minister presidente, manera otro companianan estatal.
A pesar di esaki nan por a cumpli cu tur dos, di un banda a duna gobierno extra dividend, y di otro banda nan ta baha prijs di coriente. E ta haya cu a pesar cu un ta afecta otro, toch nan por cumpli cu tur dos.
El a bisa cu un factor cu a facilita e reduccion riba tarifa di coriente tin di haci cu nan a logra baha e gasto di operacion di e compania di utilidad. El a cuminsa cu WEB cu a baha su tarifa como compania productor di coriente, y consecuentemente Elmar por a baha su tarifa pa pueblo y comercio.
Pero tambe cu nan a cumpra combustibel adelanta 75% na un prijs preferencial pa henter un aña, evitando di antemano e cambio cu e prijs riba mercado internacional di combustibel.
