E Comision Interamericano di Derecho Humano (CIDH) a recomenda crea un mecanismo di investigacion internacional pa esclarece e violencia durante e crisis politico despues di eleccion presidencial di october pasa na Bolivia, unda a cay 36 morto.
Den un informe publica ayera despues di un bishita na e pais, e entidad liga na Organisacion di Estadonan Americano (OEA), a conseha crea un grupo internacional di experto independiente, cu “garantia di autonomia y independencia pa sigura derecho di berdad y identifica debidamente e responsablenan”.
Despues di e eleccion di 20 di october den cual presidente Evo Morales tabata busca un di cuatro mandato, oposicion a denuncia fraude despues cu a para e conteo di voto pa mas cu 20 ora, loke a provoca un ola di protesta.
Morales, e prome mandatario indigena di e pais, a renuncia dia 10 di november bao presion di oposicion y di forsanan di seguridad, cu a urgi Morales pa renuncia pa permiti “pacificacion” di e pais. Actualmente tin na Bolivia un gobierno di transicion encabesa pa e ex-senador derechista Jeanine Añez.
E Comision a indica cu den contexto di e crisis y te 27 di november, tabatin noticia di 36 persona cu a perde nan bida na Bolivia. CIDH a denuncia cu durante nan bishita nan a ricibi abundante informacion di dos masacre cometi na Sacaba y na Senkata, dia 15 y 19 di november, respectivamente, den cual por lo menos 18 persona a perde nan bida.
Na Sacaba, cerca di Cochabamba, CIDH a ricibi informacion cu agentenan policial y militar a tira riba un manifestacion pacifico cu tabata exigi retorno di Morales, loke a resulta den nuebe morto.
