A pesar di a presenta diferente solucion pa por satisface Managernan di Unidad di Colegio E.P.I y sindicato SIMAR riba 3 punto y 5 exigencia concreto cu nan a presenta, Managernan di Unidad tin 5 dia sin presenta na pia di trabou. Aunke directiva y docentenan a duna cooperacion completo y a purba facilita studiantenan den tur unidadnan, e ausencia di Managernan di Unidad a trece varios problema, entre otro rooster cu no ta optimal. SIMAR mes a presenta detayenan di e impacto di nan ausencia durante un rueda di prensa diahuebs dia 25 di augustus.
Siman pasa SIMAR y Managernan di Unidad a presenta via di nan abogado un carta cu 5 exigencia concreto na Gobierno, di cual nan doño di trabou a bay di acuerdo cu 4 di e 5 exigencianan e mesun dia, cu ta inclui 1) Oranan adicional pa docentenan pa sostene e Managernan di Unidad den nan tareanan, 2) Lo facilita nan den 2 siman cu nan descripcion di funcion actualisa, 3) Den un periodo di 3 luna lo duna claridad riba e proceso di “functiehuis” y implicacion specifico pa MBO na Aruba, 4) Gobierno lo facilita cu un proceso di mediado externo pa guia directiva y Managernan di Unidad pa mehora e comunicacion y colaboracion.
Adicional na tur esaki Gobierno a ofrece Managernan di Unidad un compensacion (gratificacion) pa e periodo cu ta trahando riba e structura di e scol. A presenta un solucion factibel na SIMAR y Managernan di Unidad otorgando 32ora di tarea adicional pa cada unidad pa por wordo aloca na docentenan cu por haci cierto trabounan den e unidadnan cu tin 2 Manager te ora bin claridad riba e structura di e scol, incluyendo kico ta e cantidad di Managernan di Unidad necesario a base di entre otro cuanto alumno y curso cada unidad tin.
Esakinan ta e puntonan cu mester wordo clarifica prome cu bay over na nombra un otro Managernan di Unidad. Tur esaki lo keda cla dentro di 4 luna, pues no ta pa un tempo indefini. Lastimamente SIMAR y Managernan di Unidad no a acepta esaki y ta keda para riba nan punto cu vacatura pa e di 3 manager mester sali mesora sin cu e proceso a keda finalisa.
Ta di lamenta cu e Managernan di Unidad a perde e interes general for di bista y nan posicion ta perhudicando e docentenan, studiantenan y e organisacion den su totalidad. Manera palabra e descripcion di tarea nobo di tanto managernan di estudio como managernan di guia a keda formalisa y inclui den e buki di funcion pa cu e Proyecto di restructuracion di salario. E punto cu tin pendiente ta e maneho di formacion cu lo defini e cantidad di managernan na cada unidad.
Awor a cuminsa un caso sumario den Corte contra sindicato SIMAR y Managernan di Unidad pa instrui nan pa resumi nan trabou na bienestar di studiantenan y docentenan manera debe ser. Fecha y orario di caso sumario ainda no ta conoci pero mirando urgencia ta anticipando cu esaki lo tuma luga den e dianan nos dilanti.
