Na luga di Prome Ministro, awor ta lider di fraccion gubernamental ta propaganda Dialogo Social. Esaki despues di mas di dos aña di silencio, cu a duna impresion cu e foro aki a fayece definitivamente. Cu e lider di fraccion ta core sali cu e mensahe awor no ta nada straño. E personalmente no tabata envolvi den e proceso aki y por sirbi awor pa purba trece e partnernan social hunto, na luga di su hefe, nos Prome Ministro, cu ta keda den background lagando e parlamentario bay fula tera.
E motibo pa haci esaki ta relaciona talbes cu e manera con e Dialogo Social a ‘muri’ na 2014. Den e temporada ey ainda Prome Ministro a organisa un fiesta chikito pa celebra cinco aña di existencia, pero e insidernan tabata sa caba cu esey lo no a yuda pa rebiba e asunto. Tabatin algun aspecto cu tabata contribui na un falta di boluntad di e gremionan pa yega na mesa. E factor mas importante, cu a sali na cla tambe den e celebracion di cinco aña, tabata cu gobierno tabata establece di forma unilateral e agenda di e dialogo. No cu den tur caso esey tabata malo, pasobra tabatin tema grandi cu a bin dilanti cu mester a keda trata di tur manera. Por ehemplo e caso di reforma den sistema di pension di behes cu tabata exigi paso urgente. Finalmente loke gobierno a hiba parlamento pa ehecuta, no tabata e plan original di gobierno tampoco. Gobierno kier a logra un solucion mas aceptabel pa e sindicatonan, yegando na aumento di pension te 62 aña. Sin embargo, oposicion fuerte di banda di e gremionan empresarial cu tabata argumenta cu e medidanan previsto no tabata suficiente, a logra convence Prome Ministro cu e no por bay parlamento cu otro proposicion si no ta esun di 65 aña. Sin un acuerdo y protocol al caso, a hiba e cambionan vigente actualmente pa parlamento unda esakinan a keda aproba. Y esun cu a kere cu lo tabatin un revolte na Aruba, a sali mal ekiboca. Aruba a keda trankil, mescos a sucede na Curaçao unda a introduci e cambionan pa 65 aña di un manera mas riguroso cu na Aruba.
Pero henter e proceso aki tabata un les pa e sindicatonan cu a ripara cu si no tin acuerdo y no tin protocol, gobierno ta goberna anto sin acuerdo. Esaki no tabata tur. Na 2014 a bin e negociacion tocante e reforma di e sistema di pension bao di APFA, cu ta toca empleado publico y empleado di empresa estatal cu tabata empleado publico anteriormente. A yega na un compromiso pa reduci e beneficionan di e fondo di pension, y a cambio e empleado publico a haya e indexering regla te cu aña 2024. Un punto grandi di conflicto a kita for di caminda, lagando e pregunta naturalmente con ta bay paga tur esaki. Pero gobierno e tempo ey lo tabata pensa estilo Hulandes:” wie dan leeft, die dan zorgt”. Pa di tantisimo bes a tuma problema grandi pusha manda pa futuro.
Di e manera aki, a cuminsa reina un ambiente, specialmente cerca e sindicatonan, cu yega na delibera na mesa di dialogo, lo tabata pa entrega pa yuda gobierno sali di cualkier apuro cu e por ta aden. Cerca e gremionan empresarial, cu no tabata haya oido cerca gobierno pa nan clamor pa mehora e clima empresarial, pa facilita haci negoshi na Aruba, tanto pa inversionista di exterior como pa e empresario local, tabata reina e opinion cu nan lo kier a haya un ‘say’ den agenda di e dialogo. Pero en bista di e problema pa haya e partnernan na mesa, y e problemanan cu a surgi den finanzas publico y e intervencion Hulandes despues, Dialogo Social den poco tempo a bira manera un soño distante, pa algun un pesadia cu kier lubida mas pronto posibel.
Kico anto ta e motibonan pa rebiba e foro aki? Los di e gobierno specifico cu kier organisa un foro di encuentro nacional cu e partnernan social, e forma di consulta aki por tin su balor. Ta p’esey tambe e ta un forma cu instancianan internacional ta balora explicitamente. Pero na e momento aki, den aña di eleccion caba, ta con gobierno tin pensa di trece e partnernan social aden pa discuti asunto strategico nacional, despues cu pa mas di dos aña gobierno ta dal bay ta haci loke e ta haya ta bon. Como ehemplo por sirbi loke a pasa cu e reforma fiscal cu e actual ministro di finanzas a propone, cu a haya un recepcion bastante bon den sector empresarial. Pa motibonan meramente politico a ‘kill’ e plan aki, matando asina e unico gesto cu gobierno a propone den shete aña pa mehora clima di inversion.
Si na e momento aki gobierno ta pensa cu por trece e partnernan social hunto, cu eleccion den porta, esaki por resulta bastante dificil, independiente di e tema cu tin pensa di trata. Un tema importante por ta e falta di confiansa den economia, pero ta net esey ta uno cu gobierno lo kier evadi.
