Awe ta un dia importante pa Aruba, desde aña 2013 cu Parlamento na un forma unanime a aproba un mocion di proteccion di 16 area reconoci y identifica door di un NGO – den e caso aki Aruba Birdlife Conservation (ABC) – cu a bin cu un proposicion na Parlamento. Na momento cu Gobiernonan den pasado no tabata duna atencion na nos medio ambiente, mester sigur duna danki na gruponan priva / NGOs cu si tabatin e atencion aki.

Minister di Desaroyo Teritorial, Infrastructura y Medio Ambiente Otmar Oduber a duna di conoce den un comunicado di prensa cu ‘no ta pa casualidad ora cu a forma e Ministerio, a uni e diferente departamentonan hunto, tabata netamente pa cuminsa crea un balansa den e desaroyo di nos Pais! Pa mas cu 40 aña a conoce desaroyonan infrastructural economico, sinembargo Gabinete Wever-Croes, a traves di trabou duro di parti Ministerio encarga Desaroyo Teritorial, Infrastructura y medio ambiente, durante e ultimo 20 lunanan’. Segun Oduber, a mira e importancia di tin e carteranan aki hunto pa pone e accento riba desaroyo teniendo na cuenta nos medio ambiente.

Diamars den Conseho di Minister a aproba e toelichting pa loke ta trata e Landsbesluit cu ta encera e proteccion di e 16 areanan cu e tempo ey Parlamento a aproba. Diaranson, Oduber tabatin e honor di por a firma conhuntamente cu Minister di Husticia e aanbieding pa e ley aki por cana su caminda pa yega na Gobernador y Raad van Advies, pa por finalmente firma esaki. Ta trata di un proceso di Landsbesluit (HAM), pues e no tin e proceso largo cu mester pasa Parlamento di Aruba.

DIP ta un di e departamentonan crucial den e parti di e ley cu ta defini e areanan specifico cu ta wordo protegi manera entre otro Bubali Plas. Importante pa menciona ta cu banda di proteccion di e areanan ta trahando riba e landsbesluit caminda cu lo incorpora esaki bou di e maneho di Fundacion Parke Aruba, conforme e beheersovereenkomst cu ta wordo cera cu Gobierno di Aruba, Oduber a splica.

“Ta felicita Pueblo di Aruba y Parlamento di Aruba cu den forma unanime na aña 2013 aproba esaki, cu despues di 6 aña por a logra na e punto aki. Cual un bes mas ta mustra e vision di Gobierno pa loke ta proteccion di Aruba su naturalesa y medio ambiente.”