Ayera tardi y te casi 11or anochi, pueblo di Aruba a bay duna su ultimo tributo y despedida na Juan Chabaya Lampe, conoci artisticamente como ‘Padu del Caribe’, y titula como nos Tata di Cultura.

E tributo cultural aki tabata uno masha bunita cu e participacion di artistanan den diferente expresion cultural, kendenan a crea un ambiente alegre, meymey di e tristesa cu ta laga atras e despedida di e polifacetico yiu di tera, kende tabata proximo pa cumpli su 100 aña di existencia dia 26 di april 2020.

Gobierno.
E despedida oficial aki, organisa pa Gobierno di Aruba y cu sosten di famia Lampe y fundacion Padu, a tuma luga riba e plaza patras di bestuurskantoor batisa cu e nomber di e musico Arubiano, kende a fayece dia 28 di november ultimo.

Den nomber di gobierno minister di Cultura, Xiomara Ruiz-Maduro a extende su palabra di condolencia na Padu su famia, pero tambe na henter pueblo di Aruba. Igualmente el a informa cu e acto di entiero ta tuma luga awe diabierna 6 di december for di 3or te 5or di atardi, caminda gobierno ta extende un invitacion cordial pa pueblo haci acto di presencia na kerki Protestant na Wilhelminastraat. “Ban dun’e nos ultimo ayo na su entiero na kerki protestant”, el a bisa.

E mandatario a pidi henter nos comunidad pa ayera y awe pone nos bandera halfstok como un forma di respet, reconocimento y stimacion na e feliz memoria di nos Tata di Cultura. Aunke Padu no tabata un persona cu tabatin un funcion oficial di gobierno, ‘pero si Padu tabata den funcion di pais’, el a bisa. Tambe el a haci un yamado na e emisoranan pa nan toca e musica di Padu durante e dos dianan aki.

Homenahe Cultural.
Durante e homenahe cultural aki tabatin presencia di artistanan cu a yega di interpreta Padu su obranan musical inmortal. Den e despedida aki a participa musiconan local y di afo, specialmente for di Corsou, kendenan tabatin un gran admiracion pa Padu y su obranan, entre otronan, Norman Moron kende a participa den e Concierto di Siglo cu a wordo organisa na Aruba, Corsou, Bonaire y Hulanda. Tambe Ced Ride, Jossy Brokke, Claudius, Philips, Jonathan Vieira, Robert Jeand’or, Nico Connor, Edjean Semeleer y Sharon Rose, kendenan a rindi nan ultimo tributo na Padu.

Ruiz-Maduro a bisa cu pa despedida di Padu, gobierno a dicidi di bin cu e tributo cultural postumo aki pa recorda loke Padu a nifica pa nos. El a wordo organisa na e ‘manera cu e sigur lo sinti’e honra’, e mandatario a indica. A pesar cu e ta un homenahe di despedida, ‘Padu tabata un hende cu te na ultimo tabata alegre’.

E mandatario a laga sa cu Padu su deseo tabata pa pueblo di Aruba por a record’e di un forma alegre. Ademas –segun e mandatario– Padu a brinda nos un tarima infinito pa nos por biba nos cultura.

Igualmente Ruiz-Maduro a bisa cu nos lo sigui corda Padu di e mesun forma aki den mente y curason, ‘pasobra eyden e ta keda biba pa semper.’ E mandatario a bisa cu Padu ta keda un figura importante pa nos pais, entre otro como co-autor di nos Himno Nacional, pero tambe compositor di e piesanan musical, tanto melodianan y letranan, cu mas nos ta gusta na Aruba.