Nos no ta preocupa.. Pa busca calidad…?

Recientemente nos redaccion tabata presente na e ‘reunie’ di Colegio Arubano, celebrando mas di mey siglo di existencia. Realmente e cantidad reduci di ex-alumno cu a acudi a sorprende nos. Talvez tabatin mas evento riba e mesun fecha ey cu tabata competi, o kizas simplemente pa e gran mayoria di ex-alumno e no tabata algo yamativo cu nan por a honra cu un bishita. En todo caso nos a probecha e oportunidad pa papia tambe cu varios persona di nan impresion di e scol awendia, compara cu tempo nan tabata hoben y alumno na e scol ey.

Naturalmente cu semper bo mester ta cuidadoso pa e asunto no termina den un lamento con e scol y nivel di e alumnonan a deteriora. Ta importante pa mantene cierto obhetividad den esaki. Asina mes, conversando nos a topa cu algun cifra remarcable. Por ehemplo, 50 aña pasa, na 1969, e dos klasnan di HBS-B tabatin, si nos cifranan ta corecto, cada un 24 alumno. Di cada klas tabatin dos alumno cu no a logra termina examen cu exito. Esey tabata significa un porcentahe di graduado di mas di 90%. Si nos compara esaki cu e cifranan durante e ultimo decada, nos por ripara cu e resultadonan tabata semper cerca di por lo menos 30% cu no ta logra.

Un pregunta cu ta surgi ta: e alumnonan na fin di decada di 60 tabata hopi mas inteligente? No tin absolutamente nada cu ta indica esey. E examennan awendia ta hopi mas dificil? Esey tampoco nos ta kere. Loke si nos ta kere cu gran parti di e alumnonan ta yega na dia di examen menos bon prepara. Anto si esey ta asina, por simplemente tira e culpa riba e alumnonan y bisa nan cu nan wak con nan ta prepara miho? Esey lo ta un manera demasiado facil pa descarta henter e problema. Pero kico realmente a sucede entre 50 aña pasa y awe? Pa cuminsa, mester observa cu e grupo cu tabata bay Colegio e tempo aya, tabata un grupo mas selecto di e capanan di elite y clase medio di e sociedad di e tempo ey. Mayoria di nan tabata bin di un hogar unda lesa tabata hopi mas un custumber, y esaki tabatin efecto riba resultado. Cu entrada di un grupo hopi mas amplio, a drenta tambe un grupo cu no tabata asina custumbra cu lesamento, y mucho menos na Hulandes. Esun cu ta drenta enseñansa avansa cu un deficit di vocabulario lo bay topa automaticamente cu mas problema pa presta na cierto nivel.

Pero, un persona observador lo bisa, kico a haci concretamente pa combati y remedia e situacion aki? Nos no conoce tur detaye pero e resultado tabata invisible, pasobra gradualmente e resultadonan a para bira loke nan ta awor. Acompañando e lamento generalisa tabata e critica cu e sistema di examen Hulandes ta demasiado dificil, desembocando hasta den e clamor actual pa de facto baha e nivel di nos scol secundario, a traves di un examen no na Hulandes y di menor nivel, pa ‘haci nos hubentud un fabor’. Nos ta bolbe un rato na e pregunta haci na inicio: e alumnonan di 50 aña pasa tabata mas inteligente? E contesta no ta varia: nos no ta kere esey… Ta keda como unico conclusion cu aparentemente nos ta scoge pa adapta nos criterionan, di menos nivel pa responde na e nivel mas abao di awe. Pero, pakico nos no ta acepta e reto y trata di hiba nos sistema atrobe na e nivel cu un tempo e tabatin? Esey no pa satisface e sentimento di nostalgia di e ancianonan entre nos, sino simplemente pasobra nos mester tin, mescos otro pueblo, un sentido di orguyo pa logra surpasa e actual nivel di calidad. Pakico ta reina un mentalidad di, envez di duna bataya, reconoce cu si nos haci bida mas facil pa nos hobennan y exigi menos calidad, nan y nos ta bay dilanti?

Esey lo ta totalmente contrario na loke resto di mundo ta haciendo. Puntra cualkier coach deportivo si e ta di acuerdo pa baha su norma y criterionan di calidad pa asina logra…, si, logra kico? Logra cu su alumno ta keda pega na un nivel inferior, pa cual e no por ni sali competi na otro isla? Ta parce nos cu no tin otro manera o caminda cu acepta e reto di e buskeda di calidad… den tur cos cu nos ta haci. No ta solamente den enseñansa nos ta mira e tendencia aki di evadi e problema di calidad y unda nos ta ‘settle for less’ pasobra esaki ta parce e caminda mas facil. Sin embargo, nos ta contradeci nos mes si nos ta acepta esaki di un banda y di otro nos ta critica pasobra nos ta sufri bao di e consecuencianan di trabao mediocre. Nos ta topa cu esaki den e critica di e ciudadano riba servicio gubernamental, di salud publico, di servicio di telecomunicacion, etc.

Den e mundo moderno aki e escogencianan disponible ta poco: o ta keda resigna y ta acepta e falta di calidad como un mal inevitable, o nos ta bay den e otro direccion, unda buskeda di calidad ta parce nos e unico rumbo pa por logra mehoracion, riba tur tereno.